DILI, STLTIMORLESTE.com – Estudantes husi Instituto Ciência Saude (ICS) bainhira atu halao pratika nee depende ba orariu neebe mak iha ona.
Tuir Reitor Instituto Ciência Saude (ICS), Leao Borges ba STL iha nia knar fatin, Segunda nee (13/04/2026).
“Kona-ba estudantes sira halao pratika nee depende ba iha orariu, tanba orariu pratika nian nee ita nian estudantes sira tenke halo duni pratika, teoria nian nee estudantes hotu simu teoria, depois mak halao pratika, nee ba departamentu lima neebe mak agora daudaun eziste hela iha ICS,” nia informa.
Nia dehan, estudantes sira presiza uza oportunidade nee ho diak, liu-liu ba iha pratika no teoria ninia atu nunee bainhira remata estudu bele aplika iha fatin neebe mak sira hetan servisu, nee presiza aplika ho diak, tanba sira simu ona teoria, nunee mos halao pratika ba area neebe mak sira ida-idak hili ona.
“Ita nian estudantes sira nee laos simu deit teoria husi ita nian dosentes sira, maibe depois de simu teoria, sira mos halao pratika, atu nunee ita nian estudantes sira nee bele kompriende diak ba area neebe sira hili ona,balun iha area parteira, infarmajen, farmacia, nutrisaun no seluk tan, departamentu lima nee ita nian estudantes sira halo hotu pratika,” tenik nia.
Nia hatutan, departamentu ida foin mak loke, maibe estudantes sira presiza halo pratika mos ba ida nee, tanba orariu nee iha ona, oras teoria nian no pratika nian nee sempre iha, tanba nee idak-idak halo pratika tuir orariu neebe iha ona.
Nunee mos Marciana de Jesus nuudar estudante husi ICS hatete, foin mak tama iha ICS, tanba nee aula foin hahu, nuudar estudantes neebe hili area saude nian nee presiza partisipa iha pratika no labele simu deit teoria, maibe presiza iha pratika.
(jac)
