DILI, STLTIMORLESTE.com – Estudantes balun husi Eskola Sekundariu Jeral nu. 4 Setembru Balide, iha loron primeiru horiseik la tuir ezame primeiru periodu, maibe karik diak sira bele partisipa hikas fali ezame.
Lia hirak nee hatoo husi Diretor Eskola Sekundariu Jeral nu. 4 Setembru Balide, Sergio A. da Cruz ba STL iha nia knaar fatin Kuarta nee (08/04/2026).
“Ami nian ezame loron primeiru horiseik Tersa lao normal hanesan baibain, prezensa estudantes sira nian ba ezame nee rasik masimu, maske ami nian estudantes balun mak ho kondisaun moras la tuir ezame. Maibe ami nian estudante sira marka prezensa masimu, horiseik Tersa loron dahuluk ezame nee matéria 4, ohin Kuarta matéria Geografia, Religião, Quimika,” nia dehan.
Diretor ESJ nu. 4 Setembru nee hatutan, total estudantes neebe mak partisipa iha ezame nee 1000, no ezame nee rasik hahu tuku 08 too 01 parte dader, depois tuku 01 to 05 parte lokraik, kada matéria han oras 2, maibe iha estudante balun moras neebe sei tuir ezame iha loron tuir mai.
“Ita nian estudantes neebe moras balun iha loron primeiru nee la tuir ezame, maibe sira bele tuir fali ezame iha loron tuir mai, tanba ita nian ezame nee rasik ita foin hahu ohin ba loron daruak nian, ami nian estudantes nain 5 mak moras, sira bele tuir fali ezame, ezame sei remata iha loron Segunda,” katak nia.
Nunee mos Zulmira do Rego, nuudar estudante husi ESJ nu. 4 Setembru dehan, ezame nee halao sedu, nunee dader tenke mai eskola sedu, atu nunee labele atraza, tanba nee laos aula baibain, nee ezame, kada matéria ezame tuir oras, entaun nuudar estudante dader presiza mai sedu eskola.
“Ami ezame nee halao sedu, nunee dader tenke mai eskola sedu, nunee labele atraza, tanba nee laos aula baibain, nee ezame, kada matéria ezame tuir oras, entaun nuudar estudante dader presiza mai sedu eskola,” nia haktuir.
Zulmira dehan, nee ezame primeiru periodu, hanesan estudante bainhira atu hetan valor neebe diak husi ezame nee, primeiru esforsu aan estuda, ho nunee buat hotu fasil iha ezame refere, tanba ezame loron primeiru nian remata ona,” nia deklara.
(jac)
