DILI, STLTIMORLESTE.com – Estudantes husi Eskola Sekundáriu Téknika Vokasional ba Indústria no Teknólojia (ESTV-IT) 28 de Novembro Becora-Díli hamutuk 330 finaliza ona ezame modular.
Dehan Diretor Eskola Sekundáriu Téknika Vokasional ba Indústria no Teknólojia (ESTV-IT) 28 de Novembro Becora-Díli, Tomas Pinto ba STL iha nia knaar fatin, Kinta nee (23/04/2026).
“Eskola sei tama fali tuir kalendariu edukasaun, dia 25 Abril 2026, nee ami nian estudantes sira hahu tama hikas eskola hanesan baibain. Ami nian estudantes neebe tuir ezame total hamutuk 330 pesoas, no sira halao ezame modular hotu ona,” nia esplika.
Iha sorin seluk, Diretor Eskola Hotelaria no Turizmu Bekora, Charles F. Guterres antes nee hatete, estudantes husi Eskola Hotelaria no Turizmu Bekora hamutuk 400 sei partisipa iha avaliasaun modular.
“Ami nian Eskola Tekniku Vocational la adopta ezame periodiku, maibe estudantes sira sei partisipa deit iha avaliasaun modular, signifika katak bainhira manorin sira hanorin hotu topiku sira neebe eziste iha modul ida nia laran mak sira direitamente halao kedas avaliasaun modular. Estudante atual iha ESTV – EHT Bekora hamutuk 400. Avaliasaun modular nee depende ba profesores neebe hanorin,” nia informa.
Nia dehan, Eskola Hotelaria no Turizmu Bekora iha departamentu tolu, nee mak hanesan departamentu hotelariia, culinaria no departamentu modelagen, departamentu tolu nee mak agora daudaun eziste hela iha eskola refere.
(jac)
