DILI, STLTIMORLESTE.com – Estudantes sira dader husi uma mai iha eskola atu bele partisipa iha prosesu ensinu aprendizajen, maibe realidade balun la tama no hamriik deit iha estrada.
Lia hirak nee hatoo husi Diretor Eskola Sekundariu Nobel da Paz, Jeremias P. de Jesus ba STL iha nia knar fatin, Tersa nee (12)05/2026).
“Nuudar Diretor eskola nafatin apela ba ita nian estudantes sira, fo hanoin ba sira katak, ita boot sira dader sai husi uma mai iha eskola, nee objetivu ida atu partisipa iha prosesu ensinu aprendizajen iha sala de aula, agora realidade balun deit mak tuir aula, husi ita nian profesores sira balun la tama, no tur deit iha estrada oin nee ba lakohi tama aula,” dehan nia.
Jeremias hatutan, husu mos ba inan aman sira, oinsa fo hanoin ba oan sira, bainhira mai iha eskola tenke tuir aula, laos mai tur ka hamriik fali iha estrada boot nee ba too oras fila hein ba uma deit, nee atu aprende oinsa, dala barak mak husi eskola fo hanoin ba estudantes sira, maibe la halo tuir nee oinsa.
“Ita nian estudantes sira nee fo hanoin bebeik ona, mai eskola nee labele hamriik fali iha oin nee ba, maibe mai tama iha sala para ita nian profesores kada disiplina bele hanorin imi, tuir orariu neebe mak iha ona,” nia esplika.
Nunee mos Natalino do Rego Martins da Costa dehan, nuudar estudante dader mai eskola atu tuir aprendizajen ba orariu neebe mak iha, ba maluk estudantes sira neebe mai la tuir aula no hamriik deit iha estrada, nee sira mak lakon materia, nunee mos sira lakohi aprende, tanba sai husi uma mai nee atu tuir aula, laos lakon tempu iha liur deit too oras fila ba uma, nee labele.
“Hau nudar estudante dader mai eskola atu tuir aprendizajen ba orariu neebe mak iha, ba maluk estudantes sira neebe mai la tuir aula no hamriik deit iha estrada, nee sira mak lakon materia, nunee mos sira lakohi aprende, tanba sai husi uma mai nee atu tuir aula, laos lakon tempu iha liur deit too oras fila ba uma, nee labele,” katak nia.
Tuir nia, ema ida-idak nian hanoin la hanesan, maibe bainhira inan aman haruka mai eskola nee tama aula hodi bele aprende buat ruma, se karik iha liur deit la tama, nee sira mak lakon materia.
(jac)
