DILI, STLTIMORLESTE.com – Estudantes husi nivel ensinu sekundariu no ensinu baziku Nobel da Paz, kada fulan tenke selu propinas, tanba eskola refere hanesan eskola privadu.
Informasaun nee hatoo husi Fundador Eskola Nobel da Paz, Jeremias P. de Jesus ba STL iha nia knar fatin, Kinta nee (16/07/2026).
“Ami nian estudantes sira kontinua selu Propinas, tanba ita boot sira hatene nee ami nian eskola pribadu, iha nee klase haat, foin dadaun tinan rua liu ba, sekundariu nee US$ 6, maibe iha anterior nee US$ 5, agora ba ensinu baziku, maibe ita nian estudantes sira husi anterior nian nee selu nafatin US$ 5, ensinu baziku mos hanesan deit katak, ida anterior nian kontinua ho US$ 4 too remata,maibe ida neebe mak foun US$ 5,” dehan nia.
Nia dehan, nee duni ba estudantes neebe foun husi sekundariu kada fulan selu propinas 6 dolar no Ensinu Baziku 5 dolar, durante nee estudantes sira selu Propinas lao ho diak, tanba ida nee laos fulan-fulan selu, maibe periodu mak selu dala ida, nee signifika fulan tolu too fulan haat mak selu, hanesan primeiru periodu, segundu no terseiru periodu nian.
“Iha nee ami nian eskola pribadu nee hanesan nee, ezemplu se mak ninia oan nain tolu mak tama hotu iha eskola ida nee, rua ensinu baziku no ida seluk sekundariu, nee nain rua mak selu, ida la selu Propinas, nomos labarik sira iha nee balun nain tolu ka haat, nee kbit laek, husi eskola ajuda sira, iha nee nain lima ou nen nunee,” katak nia.
Nia informa, grupu ida ema ho defisiensia kuaze nain lima nen nee rezistu tiha ona,depois ida neebe la hatene koalia, nee grupu ida kuaze nain sanolu nunee, tanba tinan uluk 2025 labarik nee hetan valor diak, agora kontinua ninia estudu iha UNTL, tanba estudantes nee hetan valor neebe mak diak.
Iha fatin hanesan, Joana da Silva,nudar estudante sekundariu Nobel da Paz hatete, nuudar estudantes sira tenke selu Propinas kada fulan tuir kustu neebe mak iha ona, dolar lima, maibe ba oin nee estudantes foun sira tenke selu dolar nen kada fulan, no ba ensinu baziku dolar lima kada fulan.
“Hau nudar estudantes ami tenke selu Propinas kada fulan tuir kustu neebe mak iha ona, dolar lima, maibe ba oin nee estudantes foun sira tenke selu dolar nen kada fulan, no ba ensinu baziku dolar lima kada fulan,” nia hatutan.
Entretantu Lucio Reis Maia hanesan estudante ensinu baziku husi Nobel da Paz dehan, eskola Nobel hanesan eskola privadu ida, nee kada fulan estudante sira tenke selu Propinas, ensinu baziku kada fulan selu dolar hat.
“Ita hatene katak, eskola Nobel hanesan eskola pribadu ida, nee kada fulan estudante sira tenke selu Propinas, ensinu baziku kada fulan selu dolar haat, nunee kada fulan ami estudantes sira tenke selu propinas,” nia informa.
(jac)
