DILI, STLTIMORLESTE.com – Eskola ESTV-IT 28 Novembru Becora husu ba Ministeriu Edukasaun (ME) atu halo reabilitasaun ba sala aprendizajen sanolu resin lima (15).
Lia hirak nee hatoo husi Diretor Eskola ESTV-IT 28 Novembru Becora-Díli, Tomas Pinto ba STL iha nia knaar fatin, Segunda nee (17/08/2026).
Nia dehan, too ohin loron sira nian sala prosesu ensinu aprendizajen hamutuk 15, neebe mak too agora seidauk halo reabilitasaun, tanba nee husi kompetensia ME nian.
“Hau hanoin konaba ami nian sala ensinu aprendizajen sanolu resin lima nee too agora ami seidauk halo reabilitasaun, ho nunee bele kria kondisaun neebe mak diak ba ita nian estudante sira inklui ekipamentus pratika nian hodi halo pratika, bainhira simu teoria sira halo mos pratika,” nia dehan.
Entretantu Superintendente Edukasaun Munisípiu Dili, Cesarina C. Guterres dehan, kondisaun infraestrutura hanesan sala de aula eskola balun presiza aumenta, liu husi reabilitasaun no konstrusaun foun nee eskola publiku hirak neebe mak lokaliza iha Munisipiu Dili.
“Ita nian kondisaun infraestrutura hanesan sala de aula eskola balun presiza aumenta liu husi reabilitasaun no konstrusaun foun, nee eskola publiku hirak neebe mak lokaliza iha Munisipiu Dili, tanba ita nian eskola iha Munisipiu Dili nee balun Ministeriu presiza halo reabilitasaun no balun mak tama iha konstrusaun foun,” nia dehan.
Entretantu Diretor Eskola Sekundariu Jeral nu. 4 Setembru Balide, Sergio A.da Cruz dehan, sala aprendizajen ualu neebe mak tenke reabilita, tanba bee moris iha sala laran, tanba sala aula neebe ohin mensiona nee sai risku ba inundasaun, tanba nee iha tempu udan bee tama too iha laran.
“Ami nian sala aprendizajen ualu neebe mak tenke reabilita, tanba bee moris iha sala laran, tanba sala de aula neebe ohin mensiona nee sai risku ba inundasaun, tanba nee iha tempu udan bee tama too iha laran,” dehan nia.
Nunee mos Deolinda Maia nuudar estudante husi ESJ nu. 4 Setembru Balide dehan, los duni sira nian sala hamutuk 8 nee bainhira udan sira labele uza ba aprendizajen, tanba hahu husi varanda too sala laran bee nalihun too bee nee maran foin bele halao aprendizajen.
“Los duni ami nian sala hamutuk 8 nee bainhira udan sira labele uza ba aprendizajen, tanba hahu husi varanda too sala laran bee nalihun too bee nee maran foin ami bele halao aprendizajen,” nia deklara.
Nunee mos Deolinda Maia nuudar estudante husi ESJ no 4 Setembru Balide dehan, los duni sira nian sala hamutuk 8 nee bainhira udan sira labele uza ba aprendizajen, tanba hahu husi varanda too sala laran bee nalihun too bee nee maran foin bele halao aprendizajen.
Iha fatin seluk, Diretor EBC Manleuana, Carlos Correia hatete, kontrusaun sala de aula husi eskola ida nee tekniku husi ME mai sukat ona, maibe konstrusaun refere sei adia ba tinan oin, maske tekniku mai sukat ona.
“Ita nian konstrusaun sala de aula husi eskola ida nee tekniku husi ME mai sukat ona, maibe konstrusaun refere sei hadia ba tinan oin, maske tekniku mai sukat ona, maibe ninia konstrusaun nee husi ita nian ME mak sei halo konstrusaun ida nee, tanba aumenta sala ba ita nian estudantes sira, kada tinan numeru estudantes sempre aumenta nafatin,” nia dehan.
(jac)
