DÍLI, STLTIMORLESTE.com – Eskola Sekundária Tékniku Vokasionál (ESTV-IT) 28 de Novembru, Becora, Díli, hetan apoiu Fundus Operasional (FO) ho montante US$ 20.000 atu responde ba nesesidade eskola, liuliu iha área ekipamentu laboratóriu, manutensaun no hadi’a infraestrutura eskolar.
Diretór ESTV-IT 28 de Novembru, Tomás Pinto, afirma ba STL, Segunda-feira (16/11/2026), katak fundus ne’e to’o ona ezekusaun 50%, no agora eskola kontinua ezekuta fundus ne’e ba faze daruak.
“Relasiona ho konsesaun eskolar, ami eskola ESTV-IT 28 utiliza ona Fundus Operasional Eskolar. Agora dadauk ami kontinua utiliza fundus ne’e. Montante US$ 20.000 ne’e atinji ona ezekusaun 50%, no agora kontinua ezekuta ba faze daruak. Prioridade mak responde ba nesesidade departamentu sira, liuliu atu aumenta ekipamentu laboratóriu, hanesan komputadór no halo manutensaun ba ekipamentu balun,” Tomás Pinto afirma.
Nia hatutan katak, fundus ne’e mós sei utiliza atu halo reparasaun ki’ik ba infraestrutura eskolar, inklui hadi’a plafon iha departamentu sira, liuliu Departamentu II, ne’ebé presiza reparasaun.
Aleinde ne’e, eskola mós utiliza fundus ne’e atu sosa materiál administrativu, hanesan tinta printer, spidol no kuadru mutin, inklui halo reparasaun ba sala aula sira ne’ebé odamatan no janela estraga.
Iha parte seluk, Diretór Eskola Sekundária Jerál (ESG) 10 de Dezembru, Comoro, Manuel Verdial, hateten katak eskola uza fundus ne’e tuir nesesidade no planu ne’ebé prepara ona antes fundus sai.
“Konaba konsesaun eskolar ne’e, parte eskola ezekuta tuir ami-nia planu ne’ebé iha, tanba molok osan ne’e sai, ami iha ona planu atu ezekuta. Nune’e, ami uza fundus ne’e tuir planu ne’ebé prepara ona, liuliu ba nesesidade eskola nian,” Manuel Verdial esplika.
Enkuantu ne’e, Diretór Nasionál Ensinu Sekundáriu iha Ministériu Edukasaun (ME), Benjamin Gomes da Cruz Fernandes, informa katak eskola sira ne’ebé simu fundus hosi Ministériu Edukasaun, depois ezekuta fundus ne’e, tenke aprezenta relatóriu ba Ministériu Edukasaun.
(jac)






