BAUCAU, STLTIMORLESTE.com – Kompaña Esperansa Timor Oan (ETO) hala’o konsultasaun ho Autoridade Munisípal no lideransa Suku sira husi Munisípiu Baucau no Viqueque, atu hala’o estudu mapamentu jeolójiku iha área konsensaun PSC TL-OT-22-21, Bloku B, ne’ebé kobre área iha munisípiu rua refere.
Reprezentante CEO ETO, Jacinto Noronha hateten katak, ETO asina ona kontratu ho Autoridade Nasionál Petróleu iha loron 6 Abril 2026, tanba ne’e liuhusi konsultasaun refere atu koordena no informa ba Autoridade Munisípal, Postu no Suku sira husi Munisípiu Baucau no Viqueque, antes tékniku sira husi kompaña tama ba faze levantamentu no estudu jeolójiku ba identifika potensialidade mina no gás iha rai okos área juridiku Munisípiu Baucau no Viqueque nian.
“ETO manán Bloku B ne’ebé abranje área Munisípiu Baucau no Viqueque. Ambitu husi sorumutu ida ne’e atu fó hatene ba Nai no Lou sira katak iha tempu badak ami nia tékniku sira sei ba iha fatin atu halo estudu mapamentu jeolójiku,” hateten Jacinto Noronha iha ambitu konsultasaun ne’ebé realiza Sentru Konvensoens Vila Baucau, Sesta (04/09/2026).
Nia esplika, servisu dahuluk ne’ebé ETO sei hala’o mak hanesan estudu mapamentu jeolójiku no estudu remote sensing ne’ebé sei hala’o iha periodu 2026-2027, periodu 2027-2028 hala’o akizasaun no estudu jeofizika inklui survey seismiku no periodu ikus 2028-2029 hala’o perfurasaun no sei deside bazeia ba rezultadu estudu jeolójiku no jeofizika.
Nia subliña, ba faze explorasaun petroleum nian presiza investimentu no orsamentu boot, tanba prosesu ne’e iha risku bele hetan no lahetan rezultadu, maibé hanesan Timor-oan prontu ezekuta servisu ne’ebé iha ho lema ‘Esperansa la Bosok’, no fó fiar ba rai lulik nia tulun sei hetan rekursu petroleum hodi fó benefisiu ba povu no nasaun.
“Ami nia tékniku sira ba iha ne’eba atu husu ba Nai Prezidente Autoridade no Polísia bele disponiviliza espasu para sira hala’o estudu prosesu detalhadu buka mina rai iha Bloku B,” nia hateten.
Além husi atividade eksplorasaun, ETO mós iha obrigasaun no kompromisu kona-ba konteudu lokál durante implementasaun kontratu PSC TL-OT-22-21.
Noronha esplika, iha primeiru faze husi PSC, ETO hala’o ona apoiu ba projetu kontendu lokál, konstrui kampu futsal iha Uaimori Tula no Momentu Rekonsiliasaun iha Manuboe, Ossu, Viqueque inklui ida iha Munisípiu Baucau, ne’ebé kada projetu hetan aloka osan US$ 60,000 husi ETO.
(tom)
