DILI, STLTIMORLESTE.com – Evita buat neebe ema hotu la gosta atu akontese bá oan sira, responsavel inan aman sira nian mak tenke kontrola no kuidadu oan sira nia movimentu bainhira sai husi uma.
Tuir Profesora Clarinha dos Santos katak, evita buat neebe ema hotu la gosta atu akontese bá oan sira hanesan isin rua sedu, depois too ikus tenke soe bebe. Buat sira nee hotu akontese, tanba dala barak mos husi kontrolu no atensaun husi familia sira liu-liu inan aman neebe menus. Dala ruma inan aman preokupa liu ho servisu, entaun haluha tiha atu kontrolu oan sira nia movimentu hanesan oras tama no sai eskola nian, nunee mos ho atividade sira seluk.
Nia katak, nuudar inan aman nia responsavel laos deit buka osan hodi fo hatais no fo han oan sira, maibe importante mos atu kontrola oan sira nia hatais, sira nia telefone no sira nia oras tama no sai husi eskola nomos atividade sira seluk, atu nunee bele hatene tuir sira nia situasaun.
“Dala barak nee ita inan aman preokupa liu ho asuntu servisu nian, tanba hanoin liu atu hetan osan maibe haluha tiha oan sira nia movimentu iha uma no bainhira sai husi uma. Bainhira ita husik sira lao mesak, sira sei livre husi buat hotu neebe sira halo bá tanba laiha kontrolu no atensaun husi inan aman sira,” dehan nia bá STL iha Vila Verde, Kuarta (01/04/2026).
Nia hatutan, bainhira iha kontrolu no atensaun husi inan aman sira, maske sira iha namorada/o maibe sira lao tuir dalan, tanba sempre hetan atensaun husi inan aman sira. Husi atensaun no kontrola husi iman aman sira bele evita buat neebe ema la gosta atu akontese bá oan sira.
Nunee mos Diretor Jeral Eskola Nicolao Lobato, Rui Lopes dehan, estudante sira nee eskola la bandu atu namora maibe tenke iha nia parte. Iha eskola Profesor sira sempre fo hanoin bá estudante sira atu evita situasaun sira neebe ema la gosta atu labele akontese durante sei iha prosesu estudu laran.
Nia katak, buat sira nee sempre fo hanoin bá alin estudante sira atu labele akontese isin rua sedu bainhira sei eskola. Tanba ho idade neebe sei kiik haree estuda no eskola hodi hanoin bá futuru, duke kaben sedu no isin rua sedu.
“Buat sira nee ami sempre fo hanoin bá sira para labele akontese, maibe buat sira nee hotu atu labele akontese, fila fali bá pesoal idak-idak, familia liu-liu inan no aman. Bainhira iha eskola profesor sira sempre tau matan, maibe tempu ho manorin nain sira nee menus, barak liu mak iha uma. Tanba nee mak wainhira iha eskola, manorin sira sempre fo hanoin no fo orientasaun hanesan nee. Maibe fila fali bá uma, inan aman la kontrola, entaun situasaun sira hanesan isin rua sedu no ikus soe bebe nee sempre mosu,” dehan nia.
Nia hatutan, pior liu mak sira neebe hela iha kost, nee sempre mosu buat barak-barak. Nee tanba sira lao tuir sira nia hakarak, laiha ema ida kontrola. Maibe kuandu hela ho inan aman no familia bele tau matan, maibe kuandu iha kost nee sira lao livre, maibe ida nee mos direitu ema nian.
Nia afirma, bainhira iha eskola profesor sira tau matan, maibe fila ona bá uma nee inan aman nia responsavel. Hanesan iha eskola nee, iha tinan kotuk mos akontese estudante kelas 3 isin rua. Situasaun nee eskola la hasai sira husi eskola maibe fo sansaun sira iha liur hodi hein too partus hotu tuir deit ezame. Tanba sira nia dadus primeiru no segundu periode nian hatama ona bá ezame nasional hafoin akontese estudante isin rua. Husi nee tenke haruka sira iha uma deit, depois partus tiha mak foin bele tuir ezame.
“Bainhira kuandu ezame atu hahu mak sira foin atu partus ka seidauk partus, nee eskola la autoriza sira tuir. Maibe depois de partus mak atu tama bá ezame liu fulan ida ka semana hanesan nee atu ezame nasional, nee autoriza sira tuir. Ida nee autoriza deit bá estudante kelas 3 deit, karik akontese bá kelas 1 no 2 eskola hasai sira,” dehan nia.
Nia katak, tanba bainhira akontese situasaun nee inan aman mai hasoru eskola, tanis hatoo sira nia oan nia problema no eskola halo karta hodi haruka deskansa iha uma, too ezame nasional mak tuir.
(dom)
