BAUKAU, STLTIMORLESTE.com – Ezekusaun Orsamentu Jeral Estadu (OJE) 2025 neebe aloka ba Administrasaun Autoridade Munisipiu Baukau, atinji ona 30,1%.
“Koalia kona-ba ezekusaun orsamentu 2025 nian, Munisipiu Baukau nian ita atinji 30,1%,” informa Prezidente Autoridade Munisipiu Baukau, Veneranda Lemos ba jornalista STL iha Vila Nova, Baukau, Kurta nee (07/05/2025).
Total OJE 2025 neebe Governu Sentral aloka ba Administrasaun Autoridade Munisipiu Baukau, bazeia ba lei 21/2023 loron 27 Dezembru hamutuk US$ 12,437,474.00 neebe fahe ba kategoria haat mak hanesan Salariu Vensimentu US$ 2,812,445.00, Bens no Servisu US$ 772,510.00, Transferensia Publika US$ 7,445,580.00 no Kapital Dezenvolvimentu US$ 1,407,212.00.
Orsamentu alokadu husi Governu Sentral ba Autoridade Munisipiu Baukau daudaun atinji 30,1%, ezekusaun husi fulan Janeiru too Abril 2025, ba Salariu Vensimentu ezekusaun atinji 23%, Bens no Servisu 6%, Transferensia Publika 60% no Kapital Dezenvolvimentu ezekusaun atinji 11%.
Progresu ezekusaun tuir dividas iha Administrasaun Autoridade Munisipiu Baukau, Servisu Munisipal Finansas (SM-Finansas) atinji taxa ezekusaun 25.98% (US$ 43,884.00) husi total alokasaun orsamentu US$ 168,904.00, SM-Saude taxa ezekusaun 37.88%, (US$ 105,635.70) husi total alokasaun orsamentu US$ 325,896.00.
SM-E taxa ezekusaun 40.74% (US$ 1,242,090.31) husi total alokasaun orsamentu US$ 3,048,797.00, SM-A taxa ezekusaun 32.65% (US$ 155,746.46) husi alokasaun orsamentu US$ 477,051.00, SM-OP taxa ezekusaun 33% (US$ 40,134.72) husi alokasaun orsamentu US$ 121,634.00 no SM-ASeA taxa ezekusaun 34.68% (US$ 49,838) husi total alokasaun orsamentu US$ 143,692.00.
SM-GMeT taxa ezekusaun 32.40% (US$ 14,288.96) husi total alokasaun orsamentu US$ 44,103.00, SM-RNeC taxa ezekusaun 32,27% (US$ 15,927.00) husi alokasaun orsamentu US$ 49,358.00, SM-PCeGDN taxa ezekusaun 24.27% (US$ 15,633.96) husi alokasaun orsamentu US$ 64,405.00 no SM-SA taxa ezekusaun 36.15% (US$ 21,548.00) husi total alokasaun orsamentu US$ 59,604.00.
Enkuantu alokasaun ba Autoridade Munisipiu Administrativu Ualu, taxa ezekusaun 17,92% (10.033.38) husi total alokasaun orsamentu US$ 56,000.00, SM-Asaun Sosial taxa ezekusaun 24.44% (US$ 28,943.56) husi total alokasaun orsamentu US$ 118,417.00.
SM-PID taxa ezekusaun 24.44% (US$ 28,943.46) husi alokasaun orsamentu US$ 118,417.00 ba projetu 5 retensaun 10% husi projetu 2024, no konstrusaun projetu foun husi Programa Dezenvolvimentu Integradu Munisipal (PDIM) 2025 nian ezekusaun sei 0%, tanba seidauk implementa.
“Ezekusaun nee laos aat, sei nafatin iha nia margin hela, se implementa ba projetu PDIM nian mak hotu bele halo ona pedidu pagamentu ba persentajen tuir lei hateten 25% entaun ita nia ezekusaun bele sae tan,” Veneranda Lemos akresenta.
Tuir Prezidente Autoridade Munisipiu Baukau nee katak, ezekusaun orsamentu 2025 iha Baukau foin atinji 30,1%, nee diak hela, tanba foin remata trimestral dahuluk no projetu foun husi PDIM 2025 seidauk implementa, maibe bainhira implementa no tuir lei haruka kompanhia implementador submete pedidu pagamentu ba 25% nian, mak ezekusaun sei aumenta.
“Hau nafatin apela ba Diretores sira hotu laiha ema ida servisu mesak, maibe servisu interligadu para ita ezekuta ho kualidade, ba hau nafatin tau atensaun masimu ba Diretores sira nia servisu,” Veneranda rekomenda.
PAM Baukau Veneranda Lemos, lo-loos ezekusaun orsamentu ba trimestral dahuluk no kontinua ba trimestral daruak iha faze klaran, loloos ezekusaun orsamentu too ona 40%, maibe seidauk, tanba projetu foun PDIM 2025 seidauk implementa.
Nunee ba ezekusaun atu lao diak liu tan ho kualidade ba interese publiku, mak Autoridade Munisipiu Baukau husu dirijente sira atu servisu hamutuk hod aselera prosesu implementasaun projetu foun tinan 2025 nian hodi kreze ezekusaun diak liu tan.
Entretantu projetu foun tinan 2025 neebe atu implementa hamutuk 8 mak hanesan konstrusaun edifisiu saude ba Suku Libagua, Postu Administrativu Laga, konstrusaun rezidensia ba pesoal saude iha Ossokeli Vemasi, Postu Saude Laisorulai no Lelalai Matebian, konstrusaun rezidensia ba Pesoal Saude Afasa no Eskola Baziku Filial Uakulu Abafala Kelikai Antigu inklui konstrusaun edifisiu eskola Aslarigua Postu Laga neebe sei responsabiliza husi kompanhia lokal sira, alokasaun orsamentu ba projetu 8 refere hamutuk US$ 1,247,297.60.
(tom)
