DILI, STLTIMORLESTE.com – Konselhu Imprensa Timor Leste (KI-TL) realiza reuniaun ho reprezentante midia no asosiasaun jornalista kona ba planu formasaun ba jornalista sira iha tinan ida nee nia laran ho total orsamentu neebé prevee ba iha formasaun nee hamutuk rihun US$ 200.
Reuniaun neebe lidera husi Diretor Ezekutivu KI-TL, Antonio Dias, halao iha Salaun Konferensia KI, Kintal Boot, Dili, Kinta (9/4/2026).
Diretór Ezekutivu KI-TL, António Dias, neebe aprezenta planu formasaun nee ba reprezentante midia no asosiasaun jornalista sira katak formasaun iha tinan 2026 nee mai ho inisiativa ida-neebé Primeiru Ministru (PM) Kay Rala Xanana Gusmão nian atu kapasita ba serbisu jornalizmu nian iha nasaun ida nee.
Tanba nee, katak Antonio Dias, bazeia ba inisiativa ida-nee mak KI halo planu atu implementa ba formasaun sira neebé adekuadu atu eleva kapasidade jornalista sira nian iha Timor-Leste hodi hatan ba monitorizasaun neebé KI halo no mós hatan ba kestaun sira neebé públiku kestiona kona ba kualidade informasaun iha Timor Leste.
“Haree ba kestaun sira nee, KI formula sai formatu ida-neebé formasaun nee karakter nasionál no internasionál ho objetivu ida atu loke jornalista sira-nia orizonte pensamentu atu informasaun nee la natón deit ida-neebé sira rona no haree husi entrevistadór sira, maibé iha kapasidade atu luku klean kapasidade interpreta dadus sira dijitál nee sai informasaun sira neebé laós komplikadu atu públiku komprende saida mak lao iha nasaun liu husi jornalista sira fó sai,” dehan Antonio.
Nia haktuir tan katak, kestaun seluk husi formasaun nee mak atu ajuda jornalista sira tanba jornalista sira mai husi era mídia tradisionál ba dijitál no agora multiplataforma, nunee atu ajuda jornalista sira adapta-an ho jestaun multiplataforma nee, atu sira uza didiak multiplataforma nee ho kapasidade katak maske iha multiplataforma maibé sira iha kapasidade hakerek nee la lakon plataforma ida-idak ninia karakterístika.
Hatan kona ba topiku formasaun neebe sira sei foku, Antonio Dias hatete topiku maka kona ba resportajen investigativu, oinsá hakerek feature ba rádiu, televizaun, jornál no online no sei foka mós kona-ba oinsá kompriende dadus eletróniku neebé iha interpreta ba serbisu jornalizmu nian no oinsá mak haree situasaun agora jornalizmu iha era Intelijénsia Artifisiál (IA), uza dadus IA nee oinsá ho étika, no formasaun kona-ba verifikasaun faktu hodi kombate hoax sira, ida-nee formadór sei mai husi Indonézia.
Alein de formador sira husi rai liur, formadór timoroan ka nasionál sei foku ba kestaun jurídiku ninian oinsá ajuda jornalista sira iha ezatidaun atu temi termolojia sira jurídika ninian, simplifika termu sira nee no kompriende prosesu sira tribunál ninian ba iha prosesu kriminal sivíl no kestaun seguransa ninian, kestaun ekonomia atu jornalista sira kompriende didiak saida mak makro ekonómiku no oinsá lee relatóriu finanseira Estadu nian ka rejiaun ida nian.
Sujestaun no Rekomendasaun
Iha reuniaun nee, reprezentante kada mídia sira mós hato’o sira nia sujestaun no rekomendasaun balu ba KI liga ho formasaun neebe halao loron lima deit la sufisiente ba jornalista sira atu kompriende didiak liuliu liga ba jornalista investigativu ninian.
Hatan kona ba sujestaun no rekomendasaun nee, Antonio Dias hatete husi parte KI nian simu sujestaun no rekomendasaun hotu neebé sira rona no sira sei haree, saida mak sira bele halo, tanba ho limitasaun finanseira entaun buat balu halo agora no balun bele tau ba tinan oin.
Nia dehan, formasaun ba etapa dahuluk sei hahú entre 20-24 Abríl no husi neebá sei to’o Setembru 2026. Total formandu neebé sei tuir formasaun kuaze 300 no kada formasaun jornalista 30 mai husi midia dijital no imprimi iha Timor Leste.
(mik)
