BAUCAU, STLTIMORLESTE.com – Ezersisiu fiziku sai programa primadona ba Ministra Saude (MS), Elia dos Reis Amaral, atu implementa iha tinan 2027.
Deklarasaun nee Ministra Saude Elia dos Reis Amaral hateten liu husi nia diskursu iha serimonia ensera sorumutu Konsultativu Livru Matadalan Monotorizasaun no Avaliasaun Servisu Nasional Ambulansia Emerjensia Medika, iha Salaun Soi Mali, Vila Nova Baucau, Sesta (14/08/2026).
“Se hakarak ita goza nia instrumentu diak ba saude saudavel mak ezersisiu fiziku laiha tan buat seluk, ezersisiu fiziku sai osan mean nee mak prioridade ba Nonu Governu nian, liu liu ba Ministeriu Saude ba iha tinan oin sai programa primadona, ezersisiu fiziku atu bele halo investimentu ba ita nia aan rasik,” hateten MS Elia.
Nia esplika, ezersisiu fiziku mak dalan diak ba moris saudavel no hadia istilu moris nunee atu implementa hodi ema hotu halao ezersisiu fiziku, tanba estilu moris ohin loron nian, maioria sidadaun la halo ezersisiu fiziku, neebe iha impaktu ba saude.
Nia sublina, ezersisiu fiziku la prezisa book aan durante oras naruk, maibe kada loron book aan ho durasaun minutu 30, bele ona kontribui ba saude saudavel, tanba agora daudaun mudansa aihan, mudansa estilu vida, maibe la book aan.
“Neineik ba beibeik maibe ita fo hanoin malu atu nunee bele sai investimentu neebe diak ba ita nia saude, ezersisiu fiziku la karun, se ita boot sira hili investimentu karun tama Hospital, hau nia mensajem mak nee, ezersisiu fiziku,” katak Ministra Elia.
Governante nee sei koordena ho Autoridade Munisipal sira liu husi Ministeriu Administrasaun Estatal, atu iha nivel Munisipiu hotu halao ezersisiu fiziku.
(tom)
