BAUKAU, STLTIMORLESTE.com – Falesimentu Sua Santidade Papa Francisco, nuudar momentu esperansa ba moris hias.
Bispu Dioseze Baukau, Dom Leandro Maria Alves hateten, selebrasaun festa semana santa ikus selebra iha Domingu resorreisaun neebe sarani hotu haksolok, tanba selebra Jesus Kristu nia mate no moris hias, nunee Santu sira nia mate nuudar iha momentu moris nian.
“Iha paskua ita selebra resorreisaun, ita hotu haksolok Jesus terus mate no moris hias, ita haree ema Santu sira nia mate nee sempre iha momentu sira hanesan nee, neebe mak ita bele dehan hatudu momentu moris nian kona-ba selebrasaun paskua nee, Jesus nia moris, ida nee mak esperansa neebe Amu Papa liu husi nia falesimentu hatudu esperansa mai ita katak, loos duni ita hotu hamutuk ho Kristu moris hias,” hateten Dom Leandro ba jornalista sira iha Vila Antiga, Baukau, Tersa (22/04/2025).
Mezmu nunee, Dom Leandro sente triste, tanba Igreja no mundu tomak lakon lider espiritual ba Igreja Katolika neebe sempre bolu ema hotu atu hakbesik aan ba Na’i Maromak.
Dom Leandro argumentu, Amu Papa ba Timoroan nia fuan liu husi vizita iha fulan Setembru 2024 durante loron tolu iha Timor, Timoroan hatudu domin wain tebes ba Amu Papa.
Nunee falesimentu Papa Francisco hafalun tristeza ba Timoroan hotu, hatudu reazen sentimentu tristeza liu husi sunu lilin iha fatin selebrasaun misa solenidade vizita Sua Santidade Papa Francisco mai Timor Leste iha Tasi Tolu, Dili, nunee tenke tau fiar nafatin ba Igreja, hateke ba oin no fo konfiasan tomak ba provedensia Nai Maromak nian, tanba nee Dioseze Baukau sei selebra misa requim ba Sua Santidade iha loron 26 Abril nee iha Katedral Vila Antiga.
“Misa nee atu reza husu Maromak nia laran luak hodi bele simu Amu Papa Francisco nia klamar iha Na’i Maromak nia kadunan,” esplika Dom Leandro.
Entretantu Sua Santidade Papa Francisco hakotu iis ho idade 88, iha loron 21 abril 2025, iha tuku 07:35 oras vatikanu.
(tom)
