DILI, STLTIMORLESTE.com – Iha loron Segunda, tuku 9:00 dadersan, Xefe Estadu Maior FALINTIL – Forsa Defesa Timor Leste (F-FDTL), Tenente Jeneral Domingos Raul “Falur Rate Laek” hasoru malu ho Primeiru Ministru, Kay Rala Xanana Gusmão, hodi atualiza konaba preparasaun ba komemorasaun aniversariu FALINTIL ba dala 51, iha Foho Matebian.
Tenente Jeneral Domingos Raul Falur Rate Laek informa ba Xefe Governu konaba preparasaun ikus ba komemorasaun aniversariu FALINTIL, neebe sei halao iha foho Matebian, Postu Administrativu Quelicai, Munisipiu Baucau.
“Iha enkontru nee, hau atualiza mos ba Primeiru Ministru, Kay Rala Xanana Gusmão konaba prosesu tranzisaun neebe lao hela iha instituisaun F-FDTL”, dehan Tenente Jeneral Domingos Raul Falur Rate Laek ba jornalista sira iha Palasiu Governu, Segunda (17/08/2026).
Nia aprezenta, hafoin remata husi atividade iha Matebian, sei halao tan atividade sira iha fronteira Ramelau no Manuboe Loihunu, nuudar parte husi esforsu ba rekonsiliasaun nasional, neebe inklui dimensaun interna no externa.
Iha enkontru nee, Tenente Jeneral Domingos Raul ‘Falur Rate Laek mos husu apoiu tomak husi Primeiru Ministru Kay Rala Xanana Gusmão nuudar komandante em Xefe FALINTIL nudar aman neebe harii nasaun ida nee, nuudar istoria nain, atu apoiu 100% ba prosesu tranzisaun iha F-FDTL, atu bele kontinua hadia no hametin instituisaun nee no prepara didiak ba jerasaun sira tuir mai.
“Ohin Xefe Governu mos aseita ida nee no ita la duvida konaba ida nee no bainaka importante sira neebe sei partisipa iha komemorasaun nee sei mai husi Xefe Estadu Maior Jeneral husi Malazia, Portugal, Australia, Nova Zealandia, Canada, Indonezia no Estadus Unidus Amerika mos sei mai husi ninia reprezentasaun deit. Ita konvida Xefe Estadu Maior sira nee, mai partisipa iha komemorasaun loron Falintil, tanba ida nee ita nia parseiru dezenvolvimentu sira, neebe ita nia forsa sira harii estadu ida nee, entaun ita konvida sira mai atu testamunha ita nia altu Istoriku, altu kultural, altu tradisional iha nasaun TL,” dehan nia.
Antes nee, Prezidente Konselhu Munisipais Konselhu Libertasaun Nasional (KM-CLN) Rejiaun Administrativa Espesial Oecusse-Ambeno (RAEOA), Antonio da Conceicao ‘Mau kiak Lifau’ dehan tinan nee sei laiha atividades hodi realiza selebrasaun loron Forsa Armada Libertasaun Nasional Timor Leste (FALINTIL) ba dala 51 iha Oecusse tinan 2026, Prezidente KM-CLN Oecusse ho estrutura, sei selebra hamutuk loron importante nee iha Quelicai foho matebian hun Munisipiu Baucau.
“Serimonia komemorasaun loron FALINTIL iha munisipiu hotu-hotu inklui RAEOA, sei la iha selebrasaun maibe ami hotu-hotu sei konsentra hamutuk iha Quelicai foho matebian, neebe dadauk nee ami preparadu ona atu ba selebra,” dehan Prezidente Munisipal Konselhu Libertasaun Nasional RAEOA, Antonio da Conceicao.
Nia dehan, uluk iha tempu resistensia, FALINTIL hanesan ikan, povu hanesan bee, tanba nee iha momentu neeba kundu falintil presiza buat ruma povu sempre asegura hodi atende, nunee forsa armada kontinua rejiste iha rai laran, frente klandestina kontinua ho Frente armada apoiu FALINTIL aberta informasaun ba malu ho meus oi-oin too tinan 1999 liu husi referendum povu hotu liberta rai ida nee ho perigu, maioria vota hili independensia liu husi loron konsulta popular iha 30 Agostu tinan 1999.
“Uluk ita uza Frente de Revolusionariu Timor Leste Independente (FRETILIN), maibe iha 1981, FRETILIN muda ba FALINTIL, ida nee husi ita nia maun boot Kay Rala Xanana Gusmao, maka reorganiza fali fretilin ba fali FALINTIL ho objetivu luta kontra okupasaun Indonezia iha foho,” dehan nia.
Nia dehan, FALINTIL nee liman kroat povu nian iha momentu neeba iha ailaran, luta kontra okupasaun Indonezia maka ohin hetan ona ukun rasik aan, tanba nee selebrasaun loron FALINTIL nee importante ba povu TL hodi hanoin fila fali maluk sira iha rai laran, rejiste, balun mate no balun moris.
Inunee mos Maria Coel Sila agradese ba liman kroat povu maka FALINTIL sira nia luta hamutuk ho frente armada no frente klandestina neebe uluk unidade tebes maka konsege liberta ona nasaun TL husi nasaun invazor sira.
“Hau agradese ba liman kroat povu maka FALINTIL sira neebe luta iha ai laran, ohin loron liberta ona nasaun TL, tanba nee hanesan foin sae ida, nafatin iha espritu nasionalizmu hodi kontinua luta ba dezenvolvimetu, nee obrigasaun jerasaun kontinuador iha era ukun rasik aan,” dehan nia.
(jos)
