Familia Salezianu Ohin Abertura Misa Tinan 100 Iha Fatumaka

Sarani sira lori ofertoriu ba altar, neebe simu husi Reprezentante Santa Se ba Timor Leste, Mgr. Marco Sprizzi iha altar misa Fatumaka. (Foto: STL/EST 2)

FATUMAKA, STLTIMORLESTE.com – Familia Kongregasaun Saleziana ohin abertura misa, hodi komemora tinan 100 ba primeira espedisaun Saleziana iha Timor Leste.

Selebra primeiru espedisaun ba tinan 100 iha Timor Leste nee realiza iha kolejiu Fatumaka, Suku Gariuai, Postu Administrativu Baukau, Munisipiu Baukau, iha loron 31 Janeiru 2025, neebe prezide misa husi Reprezentante Santa Se mai Timor Leste Mgr. Marco Sprizzi.

“Agora ita hotu iha nee, hamutuk atu selebra tinan 100 Salezianu sira iha Timor, ita nia fuan haksolok nakonu ho gratidaun hanai Maromak ba prezensa Saleziana iha rai Doben Timor Leste,” hatete Mgr. Marco Sprizzi iha nia omelia durante misa iha Fatumaka, Sesta (31/01/2025).

Abertura misa tinan 100 ba primeiru espedisaun Salezianu iha Timor Leste nee tuir Mgr. Marco Sprizzi haksolok tebes, tanba Salezianu dezde uluk too agora nafatin fiel ba kompromisu neebe hadomi joven sira, kuida kualidade edukasaun neebe diak ba joven sira.

Tuir Reprezentante Santa Se nee katak, kualidade edukasaun nee mak hadomi joven sira iha area oin-oin, neebe presiza tebes husi agora no kontinua ba tinan 100 mai.

Tanba tuir Karisma no Espiritu Salezianu nian atu lori joven sira ohin loron nian ba kualidade iha ensinu tekniku no ensinu sekundaria sira, liu-liu atu transmite Maromak nia domin besik ba joven sira, nunee bele hetan haksolok.

Atu joven sira seluk hetan haksolok, hanesan joven sira iha kolejiu Dom Bosco Fatumaka no seluk tan, parte Salezianu sira kompostu Diretor, Ekonomu no katekista hotu halimar hamutuk ho joven sira, prezente iha joven sira nia leet, tuir São João Bosco nian Dom ba joven sira.

“Tanba nee, hodi Amu Papa Francisco nia naran, nia mos Antigu Alunus Salezianu, hau enkoraja atu kontinua Dom Bosco nia misaun sempre haksolok iha joven sira nia leet, parabens familia Saleziana, Maromak kontinua ajuda ita atu sai nafatin hanesan nee, haksolok nafatin,” Mgr. Marco Sprizzi enkoraja.

Reprezentante Santa Se nee haktuir, liafuan São João Bosco mak haksolok sempre iha Maromak, nunee iha selebrasaun aberta misa primeiru espedisaun iha Timor Leste ba tinan 100, konvida sarani hotu atu refleta hikas ba santo joven Domingos Savio neebe São João Bosco hakoli iha nia oratoriu, neebe konsidera fatin klosok nian.

Fatin oratoriu neebe São João Bosco hakoli Santu Domingos Savio mak fatin haksolok lo-loos, tanba hetan domin husi Maromak neebe halo ema haksolok, neebe segredu São João Bosco nian, hadomi joven sira sente duni katak hetan domin ida no karakteristika unika husi São João Bosco mak Kongregasaun Saleziana Domin.

Nunee durante Antigu Alunus sira no joven sira neebe daudaun hela iha uma Saleziana sempre sente katak, nee sira nia uma, tanba nee Dom Bosco sempre koalia, espiritu familia iha uma Saleziana.

Entretantu durante misa observasaun neebe jornalista STL asesu mak, bainhira remata omelia mosu udan ho intensivu natoon, maibe familia Salezianu neebe husi Suku, Postu no Munisipiu seluk neebe partisipa iha misa refere, balu la konsege hetan mahon neebe parte komisaun organizadora sira prepara, maibe mantein iha udan laran no balu taka subrinha tuir misa too remata.

(EST 2)

Share it :

Leave a Reply

Your email address will not be published. Required fields are marked *