DILI, STLTIMORLESTE.com — Familia simu urnas Saudozu Monsenhor Martinho da Costa Lopes ho matan been iha Dili, kuarta (02/09/2026), hafoin separasaun tinan barak.
Simu urnas ne’e akontese iha rezidensia familia iha Dili, ho prezensa familia no komunidade ne’ebé mai hato’o respeitu ba saudozu.
Reprezentante familia, João da Costa Oliveira, dehan urnas ne’e la’ós deit restu mortal, maibé mos memoria importante ba familia no povu Timor-Leste.
“Ami simu ita nia urnas ho respeitu boot. Nia mak memoria ida ho valor boot ba familia no povu Timor-Leste tomak,” dehan nia.
João esplika, urnas ne’e lori hamutuk memoria kona-ba vida, servisu, sakrifisiu no esperansa Monsenhor Martinho durante nia moris.
Iha momentu solene ne’e, familia mos hato’o liafuan perdaun ba saudozu Monsenhor Martinho kona-ba buat hotu ne’ebé akontese durante tempu liubá.
“Ami husu perdaun ba liafuan, hahalok no situasaun hotu ne’ebé bele halo ita sente kanek iha laran,” dehan nia.
João dehan, familia hasoru separasaun, saudades no tristeza durante tinan naruk. Agora, familia husu ema hotu atu hametin dame no domin.
“Ita bele hili atu hametin dame, perdaun, solidariedade no unidade entre familia,” nia sublina.
Monsenhor Martinho da Costa Lopes sai Administradór Apostóliku Dioseze Dili husi 1977 to’o 1983 no figura importante iha luta ba justisa no autodeterminasaun.
Komunidade Laleia, Costantino Ximenes, dehan nia sente triste no kontente bainhira simu restu mortal Monsenhor Martinho.
“Triste tanba familia no komunidade foin simu nia. Kontente tanba Saudozu too ona nia fatin moris,” nia hatutan.
Tuir programa serimonia, restu mortal sei lori husi Laleia ba Igreja Parokia Manatuto. Governu sei muda naran Ponte Manatuto.
Ponte Manatuto sei naran foun “Ponte Mons. Martinho da Costa Lopes”, nu’udar parte husi programa homenajen ba saudozu.
Hafoin Manatuto, restu mortal sei lori ba Dili. Iha Katedrál Dili, sei tau hamutuk ho restu mortal Saudozu Dom Alberto Ricardo da Silva.
Governu mós sei inaugura Monumentu no Jardim Homenajen iha Tasi Tolu, nu’udar parte husi programa homenajen ba figura igreja.
Aleinde ne’e, Governu sei konstrui monumentu ida ba Dom Martinho iha Mehara, Tutuala, Lautém.
Tema homenajen tinan ne’e mak “Retratu Fé nian no Memoria Eterna ba Igreja no Timor-Leste”.
(jen)
