BAUKAU, STLTIMORLESTE.com – Familia vitima ba asidente trafiku iha Postu Administrativu Vemasi, Munisipiu Baukau, husu Komando Polisia Munisipiu Baukau prosesu kazu refere tuir dalan legal.
Familia vitima, Sancho Faria Freitas aprezenta, vitima sira nee feto, dirasaun husi Bairo Badoma Vemasi atu ba eskola ensinu sekundaria Vemasi treina drumband ba seremonia nasional loron 20 Maiu nian, iha neebe sira sai husi uma too iha estrada ninin atu kontinua viajem ba eskola refere, hetan soke husi karreta Estadu sapa matrikula 05-469 G diresaun husi Baukau atu ba Dili ho velosidade iha neebe too area vemasi soke sidadaun feto ida mate fatin no ida kanek atual baixa iha Hospital Rejional Eduardo Ximenes (HoREX) Baukau no ida desmaia, tanba haree nia kolega nain 2 hetan soke.
“Karreta nee ho velosidade derepente tarutu hau haree matebian iha tiha karreta leten, ida oan espelhu kona agora kanek baixa hela nee mak monu tun iha rai, ida nasa nee monu tiha ba duut laran, ida fali nee haree kolega nain rua nee trauma halai ba kedas uma,” hateten Sancho Faria Freitas ba jornalista sira iha HoREX Baukau, Kinta (14/05/2026).
Nia sublina, hafoin asindente nee akontese, parte ambulansia husi too kedas fatin evakua vitima sira ba Sentru Saude Vemasi, maibe ida seluk la konsege salva, tanba lakon vida nunee kontinua transporta ida kanek ba iha HoREX Baukau halao tratamentu.
Familia nee espresa sentimentu triste, tanba lakon alin minoridade ida neebe familia sei garante nuudar esperensa familia nian, maibe lakon vida iha asidente.
“Lamenta, tanba karreta nee Governu nian mais ou menus kontrola nia velosidade, bainhira oras servisu nian too ona karik lao ho kalma, tanba nee prosesu tenke lao ba oin ita hatene nia kronolojia nee lao oinsa” Sancho katak.
Entretantu too notisia nee publika, STL seidauk hetan komfirmasaun iha Komando Polisia Munisipiu Baukau.
(tom)
