BAUCAU, STLTIMORLESTE.com – Familia husi vitima Silvano Gomes, idade 30, neebe hetan kanek iha Aldeia Taradai, Suku Irabin de Baixo, Postu Administrativu Uatucarbau, Munisipiu Viqueque, husu justisa transparansia.
Vitima Silvano Gomes hetan kanek hafoin kondus motor KLX deskonfia la taka kapasete neebe hetan tiru husi okmun Polisia tranzitu iha Aldeia Taradai, Suku Irabin de Baixo, Postu Administrativu Uatucarbau.
“Ami sente triste tebes ho emosaun, tanba instituisaun forsa PNTL uza sasan la tuir nia dalan nee mak hau nia alin hetan kanek grave. Tanba tiru husi kotuk borus tiha iha oin nia orgaun iha laran barak mak kanek,” hatete vitima nia Maun, Reinaldo Basílio husi Hospital Nasional Guido Valadares (HNGV) Dili ba STL liu husi telefone, Domingu (16/08/2026).
Nia informa, hafoin vitima hetan kanek halao tratamentu iha Hospital Munisipal Viqueque, maibe haree kondisaun grave, tanba nee transfere kedas ba Hospital Munisipal Viqueque ba HNGV Dili halao operasaun, iha neebe operasaun ho susesu, tanba esforsu masimu husi mediku no espesialista sira iha sala operasaun HNGV Dili.
Nia sublina, daudaun vitima rasik halo ona interasaun ho parte familia sira neebe hein iha HNGV, maibe husu Instituisaun relevante sira, liu liu Provedoria Direitus Humanus no Justisa (PDHJ) atu tau atensaun masimu ba insidente neebe vitima Silvano Gomes infrenta.
“Hau rekomenda ba PNTL para investigasaun nee mais transparansia, nunee hau nia alin mos labele sai vitima deit ba utilizasaun armas neebe mak la tuir nia dalan,” nia husu.
Too Notisia nee publika, STL seidauk hetan komfirmasaun ho Komadante Komando Polisia Munisipiu Viqueqeu, kona-ba insidente refere.
(tom)
