DILI, STLTIMORLESTE.com – Grupu Akademista sira kestiona, seriedade IX Governu Konstitusional relasiona ho kualidade projetu estrada iha Munisipiu Ermera. Maski serimonia tau fatuk dahuluk foin lalais nee promete naroman ka estrada diak, maibe realidade iha terenu hatudu katak udan been tun ona asfatu sira nakfilak ka transforma ba tahu dodok.
Preokupasaun nee mosu hafoin iha fulan Marsu estraga hikas estrada ligasaun entre Postu Administrativa ho Suku sira, inklui mos iha area balu neebe foin simu lansamentu projetu reabilitasaun iha fulan Janeiru liu ba.
Iha loron 26 Janeiru 2026, Primeiru Ministru, Kay Rala Xanana Gusmão ho Ministru Obras Publika (MOP), Samuel Marcal, ofisialmente lansa estrada urbana Gleno no Gleno ba Letefoho ho orsamentu neebe finansia husi Banku Mundial. Iha momentu neeba Primeiru Ministru, Xanana Gusmão afirma katak, Ermera iha potensial boot, liu liu iha setor kafe, maibe potensial nee presiza dudu ho bee mos, estrada no edefisiu publiku neebe diak.
Maibe tuir observasaun Akademista UNTL, Pedro Soares katak, udan neebe tun foin lalais nee hatudu katak, sistema drainajen no kualidade rai monu iha Ermera, seidauk sai prioridade iha planeamentu tekniku.
“Ita haree kumpri deit ritual tau fatuk dahuluk ba kamara oin, maibe supervizaun iha baze fraku tebes. Rezultadu mak ita nia povu nafatin hulan sasan iha tahu laran, tanba estrada fila aan ka nakfilak tiha ba tahu dodok,”dehan Pedro ba STL, iha Akait Díli, Kuarta (01/04/2026).
Tuir informasaun neebe nia simu husi terenu katak, estrada ligasaun husi suku balu liga ba Postu Administrativa Atsabe kotu total iha fulan Marsu nee.”Ita nia komunidade sira kestiona tanba sa mak investimentu ho valor milionariu labele tahan hasoru tempu udan,”hatete Akademista nee.
Akademista nee husu ba Ministeriu Obras Publika (MOP) hodi halo auditoria ba kompanhia sira neebe manan kontratu, atu garante katak kualidade konstrusaun tuir duni padraun teknikau neebe asina ona. Tanba povu Ermera hein hela resposta konkretu husi Governu.” Se mak sala bainhira promesa fatuk dahuluk, nakfilak ka transforma ba tahu dodok, iha tempu udan,” dehan nia.
Entretantu antes nee iha lansamentu uluk Ministru Obras Publika (MOP), Samuel Marcal hatete, projetu sira nee presiza tempu no lao pasu ba pasu ho kualidade.
(car)
