DILI, STLTIMORLESTE.com – Sekretariadu Fundu Dezenvolvimentu Kapital Umanu (S-FDCH) ho kooperasaun Ministeriu Ensinu Superior, Siensia no Kultura (MESCC) no parseria ho profesor lian Português husi MESCC, halao teste avaliasaun kompetensia linguístika ba kandidatu sira ba bolsa estudu meritu FDCH 2026 nian.
Liu husi informasaun neebe STL asesu husi media FDCH, Sabadu (11/04/2026) hatete, teste sira kobre ba kandidatu sira husi publiku en-jerál no profesor sira husi Instituisaun Ensinu Superior Privadu (IESP), konstitui faze esensial husi prosesu selesaun ba kandidatu bolseiru ho nivel lisensiatura, mestradu no doutoramentu, neebe sei ba kontinua estudu iha nasaun sira Komunidade País sira Lian Portuges (CPLP), Brazil, Mosambike ho Portugal.
Avaliasaun nee halao durante loron 4 nia laran (19 – 25 Marsu, no 8 – 9 Abril), iha Suai Room, Timor Plaza, Kinta (09/04/2026).
Faze avaliasaun linguistika organiza ba etapa tolu mak hanesan: etapa 1a prova Komprensaun oral no eskrita, partisipa husi kandidatu 345, 259 lisensiatura no 145 ba mestradu no doutoramentu, etapa 2a teste eskrita, partisipa husi kandidatu 187 iha nivel formasaun neebe la hanesan, etapa 3a entrevista, partisipa husi kandidatu 138 ba lisensiatura, mestradu no doutoramentu.
Teste sira nee realiza ho akompanamentu direta husi Diretur Ezekutivu FDCH, Júlio Aparício, hamutuk ho Adjuntu Diretur, Rogerio Inacio Sequeira Miranda Lay. Membru júri bolsu estudu FDCH 2026 nomos ekipa rekrutamentu no asesoria téknika neebe responsavel ba prosesu selesaun tomak.
(dom)
