DILI, STLTIMORLESTE.com – Iha selebrasaun Domingu XX tempu komun, Evanjelhu Mateus 15:21-28 aprezenta ezemplu fiar makaas husi feto Jentiu ida neebe konsege hetan Jesus nia laran sadia ba nia oan feto neebe moras. Husi fiar ida nee enkoraja kristaun sira atu fee metin no konsistente ba Maromak maske hasoru dezafiu susar.
Tuir Padre Paul Kerans SVD ba STL Domingu (16/08/2026) hatete, iha selebrasaun misa Domingu XX tempu komum foti husi Evanjelhu, Mateus 15:21-28. Evanjelhu nee aprezenta ba ema feto jentiu ida neebe fiar metin ba Jesus. Maske iha inísiu Jesus la hatan no dehan Jesus mai deit ba bibi sira neebe lakon husi Israel nia uma laran, maibe tanba feto nee nia persistensia no fiar makaas, Jesus ikus mai hatudu laran sadia kura feto Jentiu nee nia oan.
“Feto nee mai hakilar dehan “Jesus David nia oan tulun hau nia oan feto moras terus tebtebes. Jesus nia resposta inisial maka silensiu. Nia la hatan ou la dehan buat ida. Maske Jesus nonok no la hatan buat ida maibe feto nee hakilar makaas liu tan. Tanba haree feto nee nia presija no fiar makaas ba Nia, nee duni Jesus hatan hodi koalia diretamente dehan, Hau mai tan deit bibi sira neebe lakon husi Israel nia uma laran,” dehan Padre.
Tuir Evanjelhu, Jesus hatene Nia aan katak tempu seidauk too atu Nia bele lori Evanjellu ba jentiu sira (feto Kana representa ema jenjiu sira) . Knaar da misaun ida nee atu lori Evanjellu ka liafuan diak ba ema seluk, liu liu ba ema jentiu sira sei mosu depois de nia mate no moris-hias.
Maibe, feto ida nee konsege aselera tempu Jesus nian liu husi nia fiar makaas hodi bele hetan Maromak nia laran sadia. Feto nee nia fiar mak book duni Jesus nia fuan no laran atu hatudu laran sadia.
Padre Paul dehan istoria simples ida nee hatudu katak feto Jentiu nee la preokupa ho polítika no divizaun sira mundu nee nian. Nia preokupa deit ho nia oan feto neebe moras todan atu bele hetan diak. Liu husi nia fiar metin ba Jesus, mak bele rezolve nia susar no terus nee.
Bibi atan kreda Katolika nee dehan iha domingo kotuk Jesus dehan ba Pedro katak o nia Fiar kiik. Maibe Domingo ohin Jesus dehan ba feto Jentiu nee katak o nia fiar boot duni. Entaun, saida maka halo feto nee nia fiar sai boot? No oinsa ema nia fiar bele boot hanesan nia? Iha Evanjellu Domingu kotuk, bainhira Pedro iha esperiensia hetan anin boot, laloran makaas, nia hanesan “terjebak” ho anin boot no laloran boot nee, nia hahu la haree no la konsentra ona atu tau matan atu Jesus no nia hahu mout iha tasi laran. Bainhira feto jentiu ida nee mos hetan anin boot no laloran makaas terus no susar tamba nia oan moras todan, nia hahu tau matan no konsentra nafatin ba Jesus no nia hakruuk iha nia oin.
“Nee mak tipu fiar ita ema nin. Katak dala ruma mos ita nia fiar sai kiik hanesan Pedro nian tamba bainhira ita hetan difikuldade, terus no susar ruma ita fila kotuk no la hare ona Maromak. Ou ita nia fiar mos dala ruma bele sai boot hanesan feto jentiu nian, tamba bainhira ita iha esperiensia terus no susar nian laran ita foin hakbesik an no foku liu ba Maromak. Feto jentiu ida nee enkoraja ita hotu atu nafatin fiel, maske ita nia base fidelidade nian parese fraku. Nia inspira ita atu kontinua buka Maromak, maske Maromak nee parese nonok no dook los husi ita,” dehan Padre.
Iha biban nee Padre Paul enkoraja sarani sira nuudar kristaun nafatin fíel no kontinua buka Maromak, maske dala ruma Maromak parese nonook no dook husi ema maibe husi fiar bele soi buat neebe ema presiza iha nia moris.
Nunee mos Padre Rikardus Pasang SVD hatete iha evanjellu ba Domingu dala XX tempu baibain ohin hanorin ema katak Maromak nia domin la iha barreira. Nia sobu moru sira no nia uma nakloke ba nasaun hotu-hotu. Liafuan sira neebe lee ohin maka: Izaias 56:1,6-7, Roma 11:32, no Mateus 15:21-28.
Iha nia lia menon, Padre Rikardus Pasang, SVD foti ezemplu husi Evanjellu feto Kanaan nian. Maske iha dalan nonook, feto nee nafatin hakilar ba Jesus. Maske iha inisiu ema la liga no la rona nia, maibe nia la hakiduk.
“Nia husu deit hahan restu husi ita nia meza, no Jesus hatan. O nia fee boot. Ida nee hatudu katak Maromak nia domin la konta se maka merese ka lae,” dehan Padre Rikardus.
Nia sublina tan liafuan Izaias nian “Hau nia uma, uma orasaun ba nasaun hotu-hotu, Tanba nee Maromak la husu ema nia ran, maibe fuan neebe lori domin no laran nakloke.
(eme)
