BAUKAU, STLTIMORLESTE.com – Selebra festa Paskua, Komando Polisia Nasional Timor Leste (PNTL) Munisipiu Baukau rejistu kazu asaltu malu iha area Uaiaka Mulia, Suku Uaitame, Postu Administrativu Kelikai Antigu.
Komandante Interinu Polisia Baukau, Superintendente, João Sancho Pires hateten, durante misa semana santa hahu husi Domingu Ramos too Domingu resurreisaun, situasaun iha nivel igreja kuaze lao kontroladu, tanba kooperasaun masimu husi entidades hotu iha Munisipiu Baukau neebe iha maturidade hodi garante pas no estabilidade.
Maibe iha kazu asaltu malu ida, akontese iha loron 18 Abril nee, tanba hadau malu fatuk iha mota Uaiaka Mulia, neebe involve husi komunidade balun area Mulia no Komunidade balun husi Suku Seiçal Postu Baukau Vila hodi rezulta sidadaun faan fatuk balun hetan kanek.
“Durante misa situasaun lao diak hela, maibe akontese kazu kiik ida iha Mulia ligadu hadau malu fatuk iha mota laran laiha informasaun ba malu nee mak sira asaltu malu, iha vitima nain rua,” hateten João Sancho Pires ba jornalista sira iha Vila Nova, Segunda (21/04/2025).
Vitima nain rua (2) neebe Komando Polisia Baukau rejistu kompostu feto ida no mane ida husi Suku Seiçal neebe faan fatuk iha area mota Uaiaka Mulia, maibe hetan asaltu husi suspeitu nian lima (5) nuudar habitante Mulia, tanba laiha konkordansia ba malu hodi faan fatuk iha mota Uaiaka Mulia.
Hafoin kazu nee akontese, Komando Polisia Munisipiu Baukau liu husi Polisia Eskuadra Postu Kelikai no Baukau Vila too iha fatin akontesimentu hodi kaptura sidadaun nain lima ho inisial JXC, JAF, JC, RC no PBMC hodi submete ba prosesu investigasaun.
“Suspeitu neebe ita foti sira mai presta deklarasaun iha Eskuadra Postu Baukau Vila ita deit hela hodi prosesu lao ba oin, ita hakarak halo prevensaun labele mosu problema entre Mulia ho Seiçal,” João Sancho Pires akresenta.
Nia sublina, asaltu malu refere la estragus uma no sasan seluk, maibe iha vitima nain rua kanek kmaan, tanba nee Komando Polisia Munisipiu Baukau liu husi Eskuadra Postu Baukau Vila detein suspeitu nian lima durante oras Ualu hodi antisipa situasaun seluk entre familia vitima no komunidade Mulia no tuir planu sei aprezenta ba Ministeiru Publiku hodi foti desizaun.
Entretantu durante semana santa Komando Polisia Munisipiu Baukau rejistu mos asidente hamutuk tolu inklui Padre Justino Afonso, maibe husi asidente tolu refere la rejistu kanek grave.
(tom)
