DILI, STLTIMORLESTE.com – Jurista Timor oan konsidera katak, ho rekrutamentu neebe iha espera Juiz neebe sei ba tur iha Supremu Tribunal Justisa (STJ) ho figura neebe iha integridade, labele hakruk ba poder politiku.
“Uma vez lei espresamente define hanesa nee, maibe hau nia hanoin atu sai Juiz iha STJ presiza mos figura neebe iha integridade no barani foti desizaun no la hakruk ba poder politiku, ida nee mak importante,” dehan Jurista Sergio Dias Quintas ba STL iha Kaikoli, Kuarta (05/08/2026).
Tuir nia, Juiz neebe atu tur iha STJ, tuir Konstituisaun RDTL iha artigu 125 numeru 2 dehan katak, knaar no kompozisaun iha STJ mak Juiz karreira nian, Majistradu Ministeriu Publiku nian no Jurista sira neebe iha naran boot.
Nia eplika, Jurista nia haree komisaun rekrutamentu ba Juiz STJ la halo servisu ho diak, no viola lei balu tanba komisaun fo oportunidade ba majistradu sira neebe servisu liu tinan 10 ona bele konkore iha pozisaun nee, maibe la haree ba kareira Juiz sira nian.
Sergio konsidera, tuir lo-loos nee labele, tanba viola artigu 63 numeru 1 alinea A husi Etatutu Majistradu Judisial neebe hateten katak, Juiz neebe atu tur iha STJ tenki Juiz desembargador neebe iha klasifikasaun muito bom ka pelo menos iha kareira elevada, tanba iha lei numeru 25/2021 konaba organizasaun judisiaria iha artigu 30 numeru 1 mos dehan katak, atu sai Juiz STJ tenki haree husi Juizes karreira sira.
Iha sorin seluk, Akademiku UNTL Sebastião dos Santos dehan, presiza Juiz neebe tur iha STJ tenke iha kapasidade diak, tanba se iha ona STJ mak.hatudu katak, nia mak.deside ultima desizaun.
“Hau hanoin se iha STJ nia mak hanesan Tribunal neebe aas liu, presiza duni Juiz neebe iha kapasidade diak hodi tur iha neeba,” dehan nia.
Afirma tan, ohin loron Timor oan balu iha kapasidade neebe diak, tanba nee liu husi selesaun nee bele selesiona Juiz ida neebe kapasidade diak atu ba tur iha neeba.
Aleinde nee, Komisariu Komisaun Rekrutamentu Juiz Supremu Tribunal Justisa (STJ), Pedro Camões informa, konaba konkorentes nain 35 konkore ba Supremo Tribunal Justisa, tanba iha rekrutamentu nee la iha limitasaun, no vaga nee aberta ba ema hotu.
“Vaga nee aberta ba ema hotu, la iha limitasaun no vaga nee ba iha Supremo Tribunal Justisa ba sira neebe servisu tinan 10 ba leten no ba Tribunal Rekursu nee sira neebe servisu tinan 8 ba leten,” dehan Camoes.
Nia sublina, relasiona ho rekrutamentu ba Tribunal Rekursu no Supremo Tribunal Justisa nee, hahu loke iha loron 1 fulan Julhu too loron 31 fulan Julhu tinan nee, konkorentes sira kuaze iha interesadu ba aplay vaga rua nee, ba iha Tribunal Rekursu hamutuk ema nain 22 ba juiz kareira sira neebe durante seidauk promove no tekniku sira envia ona ba iha Sentru Formasaun Juridiku no Judisiariu no vaga ba Supremo Tribunal Justisa nee hamutuk nain 35 nee sei envia ba juri internasional sira iha Portugal.
Nia sublina, fizikamente sira envia dokumentus ba iha Tribunal Rekursu hamutuk nain.22 no Supremo Tribunal Justisa temporariamente rona husi Sentru Formasaun hamutuk nain-35 nee sira mai husi Majistradu kuaze hotu-hotu hatama inklui Jurista, Defensor Publiku, Prokurador nain-tolu (3) no Dosente sira neebe meritu mais de 15 anos kareira entaun hamutuk nee mak nain-35.
No sira mos seidauk rona informasaun lo-loos, sira nee hotu manda hotu liu husi eletroniku ba iha Portugal, no Juri sira hahu halo avaliasaun apartir data agora too 15 ou 20 dias nia laran halo avaliasaun ba dokumentus no ita anunsiu ba publiku.
Nia dehan, bainhira konkorentes sira reuni ho kondisoes pasa ba Tribunal Rekursu, tanba sira initividade ka kandidatu ba Supremo Tribunal justisa no ida nee sira sei manda resposta mai, bainhira Majistradu sira mai ho rezultadu negativu sei anunsiu mai iha Komisariu sira, atu bele esplika ba sira katak sira iha direitu atu bele halo reklamasaun.
“Sira uza sira nia direitu para halo reklamasaun, posibilidade dokumentus balun failla sira sei hateten ba Komisariu sira ami, sira sei hateten mak uza direitu reklama, entaun faze ida nee foin mak dokumentus rezultadu liu ou seidauk nee iha juri sira nia tempu, entaun husi 35 ba Supremo Tribunal Justisa no 22 ba Tribunal Rekursu posibilidade ema hanesan balun aplika fatin rua nee deit ba Tribunal Rekursu nee ba Juiz kareira deit,” informa nia.
Nia esplika, Juri internasional sira nee seidauk bele mai iha Nasaun Timor-Leste, tanba sei iha prosesu avaliasaun dokumentus kurikular nee envia liu husi eletronika no avaliasaun hotu hafoin sira bele mai.
“Agora Juri internasional sira mai nee atu entrevista no ezame eskrita, ida nee mak ekilibriu tempu atu labele gasta ba iha avaliasaun dokumentus, no sira mai nee hamutuk ema nain tolu no Sekretariu tekniku ida mak lao hamutuk ho sira,” dehan nia.
(ter)
