DILI, STLTIMORLESTE.com – Eskola Sekundáriu Jeral (ESJ) FINANTIL prepara ona relatóriu konsesaun eskolar, hodi bele submete ba iha Ministériu Eduksaun (ME).
Lia hirak nee hatoo husi Diretor ESJ FINANTIL, Aniceto Berlelo ba STL iha nia knaar fatin Aimutin, Kinta nee (21/05/2026).
“Kona-ba konsesaun eskolar nee ami simu tiha ona dezde iha ezame primeiru periodu ninia, no agora daudaun ami prepara fali relatóriu konsesaun eskolar nian nee atu bele submete ba Ministeriu Edukasaun, tanba konsesaun eskolar nee husi parte eskola ezekuta hotu ona, agora ezekuta ba saida deit nee husi GAT mak hatene liu,” nia esplika.
Aniceto hatutan, konsesaun eskolar nee kada estudantes ida dolar rua, nunee daudaun nee eskola prepara ona relatóriu para bele hatama ona, konsesaun nee bainhira eskola sira ezekuta hotu ona mak eskola sira tenke halo fali relatóriu ba ME.
Nunee mos Diretor Eskola Hotelaria no Turizmu Becora, Charles F. Guterres antes nee afirma, Eskola Hotelaria no Turizmu Becora too agora seidauk simu konsesaun eskolar no seidauk simu informasaun ruma bainhira mak atu simu osan ida nee.
“Too agora ami seidauk simu konsesaun eskolar, ate a data seidauk iha informasaun ruma husi ministeriu relevante, maibe ami nian relatoriu submete tiha ona ba Ministeriu Edukasaun, ba osan nee mak ami seidauk hatene, bainhira mak sai, tanba too agora ba asuntu nee rasik ami seidauk iha informasaun ruma,” dehan nia.
Nia hatutan, bainhira simu konsesaun ida nee sei responde tuir nesesidade eskola nian presiza, tanba osan ida nee kada estudantes ida dolar rua, maibe ate agora sira seidauk simu osan ida nee, total estudantes husi sira nian eskola hamutuk 400.
Iha fatin seluk Diretor Nasional Ensinu Sekundariu iha ME, Benjamin Gomes da Cruz Fernandes antes nee dehan, Ministeriu Edukasaun (ME) atribui ona konsesaun eskolar ba ensinu sekundariu jeral públiku hamutuk hitu nolu resin hitu, maibe husu eskola keta haluha halo fali relatóriu mai ME.
(jac)
