DILI, STLTIMORLESTE.com — Fundasaun Mahein (FM) ezije investigasaun seriu no justu ba kazu omisídiu ne’ebé envolve ajente seguransa.
Diretor Ezekutivu Fundasaun Mahein, Nelson Belo hatete, Polisia Nasional Timor Leste (PNTL) tenke responsabiliza ajente sira ne’ebé komete kazu durante servisu.
“Ita haree kazu iha Covalima no Viqueque ne’ebé involve ajente seguransa no uza sala kilat,” hatete Nelson Belo.
Nia ko’alia ba jornalista sira iha sede Fundasaun Mahein, Dili, Kuarta nee (09/09/2026).
Kazu iha Covalima akontese iha fulan Juñu 2026, ho vítima Terzinaha Cardoso, tuir informasaun Fundasaun Mahein.
Iha Viqueque, sidadaun Silvano Gomes mate iha fulan Agostu 2026, no kazu ne’e mos envolve ajente seguransa.
Fundasaun Mahein konsidera kazu sira ne’e hanesan preokupasaun foun kona-ba brutalidade no utilizasaun sala arma.
Nelson Belo hatete, Tribunal Primeira Instánsia Suai aplika medida prizaun preventiva ba akuzadu na’in haat.
Nia husu investigasaun ba kazu Covalima kontinua tuir prosesu legal, inklui buka faktu no responsabilidade autor.
“Nesesita estabelese faktu, identidade autor material, no buka autor intelektual iha kazu ne’e,” hatete Nelson.
Nia mos husu autoridade sira atu kontinua buka informasaun kona-ba lokalizasaun restus mortais vítima.
Fundasaun Mahein konsidera investigasaun kompleta importante atu determina sirkunstánsia no responsabilidade iha kazu omisídiu.
(jen)
