DILI, STLTIMORLESTE.com – Prezidente Republika (PR), Jose Ramos Horta hatete, Funsaun Publika sai nuudar motor ba estadu, makina neebe fornese servisu esensial ba povu no nasaun.
Prezidente Republika Jose Ramos Horta hatoo lia hirak nee liu husi nia mensajen iha Palasiu Prezidensial Nicolau Lobato, Bairo Pite, Kuarta nee (15/07/2026) ba loron Nasional Funsaun Publika.
Iha biban nee Prezidente Republika hatoo agradesimentu no apresiasaun klean ba ema idak idak neebe hakmaan aan iha Funsaun Publika neebe durante nee didika aan ona ba nasaun no povu ida nee.
“Iha Loron Nasional Funsaun Publiku ida nee, hau hatoo hau-nia agradesimentu no apresiasaun klean ba imi ida-idak ba imi dedikasaun neebe boot ba ita-nia nasaun doben. Dezde restaurasaun ita-nia independensia, Imi sai nuudar motor ba ita nia Estadu makina neebe forte hodi fornese servisu esensial sira ba ita-nia povu no lori ita nia nasaun ba oin. Imi-nia kompromisu mak sai hanesan pilar neebe ita kontinua harii ba ita nia demokrasia no futuru,” dehan Prezidente Republika.
Tema ba tinan ida nee, “Servisu publiku Asesivel, Responsivu, Transparente, Justu, no Efetivu” mak hanesan apelu ida ba asaun.
“Ida nee dezafia ita ida idak atu reflete klean konaba kualidade no impaktu husi servisu neebe ita fornese. Servisu neebe ita halo loro loron impaktu ba sidadaun ida idak nia moris. Ita-nia dever atu serbí ema hotu laho prejuizu, atu lidera ho integridade, atu atua ho kompaixaun, no avansa ita-nia dezenvolvimentu nasional ho padraun profisionalizmu neebe aas liu,” katak PR Horta.
Xefe Estadu husu ema idak idak neebe hamahan aan iha Funsaun Publika atu nafatin instituisaun no serbisu ho esperitu no prosperu.
“Enkuantu ita kontinua hametin ita nia instituisaun sira no alkansa dezenvolvimentu sustentavel, mai ita serbí ho espíritu hanesan neebe orienta ita nia povu ultrapasakapítulu sira neebe nakukun liu iha ita-nia istoria no ba naroman pas no liberdade nian,” katak Horta.
PR Ramos husu hotu hotu mai hanoin hikas katak dedikasaun neebe ema idak idak hatudu iha loron ohin forma mundu aban- ainrua nian ba oan sira, komunidade sira, no nasaun. ksolok ba loron nasional funsaun publiku.
(eme)
