DILI, STLTIMORLESTE.com – Funsionariu Publiku ida iha loron Kinta (06/02) tenta sunu karreta no edifisiu Komando PNTL Munisipiu Vikeke.
Komandante Jeral Polisia Nasional Timor Leste (PNTL), Komisariu Jeral, Henrique da Costa hatete, membru polisia husi Komando PNTL Munisipiu Vikeke kaptura sidadaun nee tanba iha loron Kinta tenta sunu karreta no edifisiu Komando PNTL Munisipiu Vikeke no fasilidade sira seluk.
Bainhira membru sira haree atu kaer nia no nia uza motor halai liu, nunee membru polisia sira duni tuir kaptura nia ho evidensia sira hanesan iskeru no tudik hodi detein iha sala Komando Munisípiu Vikeke.
“Loos duni horiseik akontese iha Munisipiu Vikeke, ninia kronolojia nee hanesan nee, iha oras tuku 13:00, wainhira ita nia membru sira deskansa hela atu han meudia, maibe iha ita nia sidadaun ida tama ba Komando Munisipiu Vikeke ho intensaun neebe mak la diak, tanba nia atu sunu karreta estadu no evidensia sira seluk neebe para hela iha neeba no atu sunu tan edifisiu Komando nian,” hateten Komisariu Jeral Henrique da Costa ba jornalista sira iha Unidade Polisia Maritima (UPM) Lesidere, Sesta (07/02/2025).
Komisariu hatutan, wainhira membru polisia sira kaptura sidadaun nee ho evidensia sira hanesan iskeru nomos tudik ida, signifika nia ho intensaun atu halo duni krimi.
Tanba nee, Komando PNTL Munisipiu Vikeke liu husi parte investigasaun rekolha ona evidensia sira hodi submete ba Ministeriu Publiku hodi tuir prosesu neebe mak iha, tanba sidadaun nee kontra lei arma branka numeru 5/2017.
“Ita nia sidadaun nee mos tuir informasaun katak nia mos funsionariu publiku ida, entaun prosesu tomak ita nia parte investigasaun Komando PNTL Vikeke halao hela, depois ida nee sei aprezenta ba iha Ministeriu Publiku,” tenik nia.
Komandante Jeral nee akresenta liu tan katak, daudaun nee suspeitu detein hela iha sela Komando PNTL Munisipiu Vikeke, no família husi suspeitu nee rasik too iha Komando Munisípiu Vikeke hodi husu deskulpa ba Komando ligadu ho aktu neebe suspeitu nee halo.
“Ninia familia sira too iha Komando Munisipiu, familia sira husu deskulpa ba polísia, hodi dehan ami nia ema nee sala, la merese para nia halo asaun ida hanesan nee, entaun ita nia parte komandante Munisipiu dehan, nee ninia erru maibe nee hahalok krimi nian,” dehan nia.
(alb)
