DILI, STLTIMORLESTE.com – Tinan oin Governu hamutuk ho G7+ nomos linhas Ministerial sira halo edukasaun sivika ba too iha area remotas, hodi bele prevene konflitu iha rai laran.
Lia hirak nee hatoo husi Sekretariu Jeral (SekJer) G7+, Helder da Costa ba jornalista sira, bainhira remata halo enkontru kortejia ho Prezidente Republika, Jose Ramos Horta iha Palasiu Prezidensial, Nicolau Lobato, Bairo Pite, Dili, Kuarta (11/12/2024).
“Ida nee ami servisu hamutuk ho governu, entidade naun Governamentais ho mos sosiedade sivil, parseiru dezenvolvimentu, ita halo edukasaun sivika tinan oin ba iha area remotas sira nee, hamutuk ho Ministériu Interior, ita mos servisu ho Ministeriu Interior prevensaun konflitu hamutuk ita tun ba munisípiu, suku, autoridade lokal ita koalia kona-ba prevensaun konflitu,” dehan SekJer G7+ nee.
Ni dehan, ida nee esforsu neebe halo hamutuk ho Ministeriu relevante, nunee mos ho Ministeriu Defeza, Polísia, Ministeriu Rekursu Naturais, buat barak mak halo iha kada Ministeriu atu bele dudu joven sira bele mantein pas no estabilidade.
“Nunee mos ami servisu hamutuk ho Ministeriu Finansas oinsa mak ita halo asistensia esterna nee efetivu liu tan, país doador bainhira mai tama Timor sira tenke ajuda ministrriu sira seluk atu bele aselera dezenvolvimentu iha nivel ministerial,” katak nia.
Sekretariu Jeral G+7, Helder hatutan, benifisiu boot iha benifisiu direitu no benifisiu indireitu, benifisiu direitu mak país barak mak ema tenta atu brilla iha nivel internasional la hetan.
Nunee mos Prezidente Republika, Jose Ramos Horta kongratula ba povu Timor Leste liu liu ba joven sira neebe mak hatudu maturidade pas no kria establidade iha rai laran.
Iha biban nee, Prezidente Republika husu joven no Timoroan hotu mantein pas no estabilidade iha rai laran, no hatudu ba mundu katak Timor iha unidade laiha konflitu.
(eme)
