DILI, STLTIMORLESTE.com – Gabinete Apoiu Tekniku (GAT) husi Ensinu Baziku Central (EBC) Manleuana halo ona planu ba ezekusaun subsidiu ka konsesaun eskolar, hodi hatama ba iha Ministeriu Edukasaun (ME) liu husi Edukasaun Munisipiu Dili.
Lia hirak nee hatoo husi Gabinete Apoiu Tekniku (GAT) husi EBC Manleuana, Narciso Pinto Soares Vieira da Costa ba jornalista STL iha nia knaar fatin Manleuana, Sesta nee (21/08/2026).
“GAT halo Planu foin hatama ba Edukasaun Munisipiu Dili parte konsesaun eskolar nian verifika los ona foin hatama ba Gabinete Diretor nian aprova mak ita foin foti TPO lori ba Banku hodi foti osan nee. Tuir planu neebe ami halo mak hanesan material ba aprendizajen, eskritoriu, artes kultura, desportu, material pratika, eletroniku no reparasaun kiik ho tan saneamentu higiene,” dehan Gabinete Apoiu Tekniku (GAT) husi EBC Manleuana,” katak nia.
Nia dehan, konaba konsesaun nee husi parte eskola nian hein informasaun husi Edukasaun Munisipiu Dili, dehan semana oin hanesan nee osan konsesaun nee bele sai ona, karik sai mak eskola ezekuta tuir planu neebe mak iha ona.
Entretantu Diretor EBC Manleuana, Carlos Correia hatete, konaba konsesaun eskolar nee seidauk sai ida, relatoriu hatama tiha ona, maibe osan nee rasik too agora seidauk sai, osan nee sai sira bele ezekuta tuir planu eskola nian neebe mak iha ona, tanba sira sei ezekuta osan ida nee tuir duni nesesidade eskola nian.
“Konaba konsesaun eskolar nee seidauk sai ida, relatoriu hatama tiha ona, maibe osan nee rasik too agora seidauk sai, osan nee sai ami bele ezekuta tuir planu eskola nian neebe mak iha ona, tanba sira sei ezekuta osan ida nee tuir duni nesesidade eskola nian,” nia haktuir.
Carlos dehan, osan ida nee kada estudantes ida dolar rua, sira sei uza ba material prosesu ensinu aprenduzajen ninian, pratika eletroniku no planu seluk tan, tanba husi eskola hatama planu ba ezekusaun osan ida nee ninian.
(jac)
