DILI, STLTIMORLESTE.com – Governu liu husi reuniaun Konselhu Ministru neebe halao iha Palásiu Governu delibera hodi dezigna Ministeriu Administrasaun Estatal (MAE) nuudar Departamentu Governamental neebe reprezenta Governu hodi sai responsavel ba koordenasaun ho Konferensia Episkopal Timorense (CET – sigla português), atu organiza serimonia omenajen ba Sua Santidade Papa Francisco.
Governu hanoin atu halao serimonia ida neebe digna, neebe reprezenta domin boot povu Timoroan nian ba Santu Padre.
Enkuantu misa serimonia omenajen ba Sua Santidade Papa Francisco iha loron Sabadu (26/04/2025) iha Tasi Tolu, misa hahu tuku 4 loraik OTL.
Nunee Governu apela ba populasaun tomak liu-liu ba funsionariu publiku sira hotu, atu durante periodu lutu nasional nee halibur malu loron-loron iha orasaun, hahu tuku 5 loraik, iha Monumentu Nain Feto iha Lesidere, nuudar jestu omenajen no rekolhimentu hodi hanoin hikas Sua Santidade Papa Francisco.
Tanba nee liu husi aprovasaun Konselhu Ministru informa mos katak, servisu administrasaun publika nafatin lao hanesan baibain durante periodu lutu nasional nee, tanba nee laos toleransia pontu ka feriadu nasional.
Aleinde nee mos iha loron Segunda feira Governu liu husi Konselhu Ministrus estraordinariu deside hodi dekreta lutu nasional iha territoriu Timor Leste tomak, nuudar sinal tristeza ba Sua Santidade Papa Francisco nia mate.
Iha periodu lutu nasional nee hahu iha tuku 10 dader, iha loron 22 Abril no remata iha meia noite iha loron 28 Abril.
Durante periodu lutu nasional hodi fo omenajen ba Maktoban Sua Santidade Papa Fransico, Bandeira Nasional tenke hasae too klaran deit iha edifísiu publiku hotu-hotu inklui embaixada.
Entretantu Governu rekonhese katak dever Estadu nian lori povu Timoroan nia naran hatudu sentidu gratidaun no rekonhesimentu neebe boot, hodi presta omenajen ida neebe merese ba lider boot igreja katolika nian.
(EST 3)
