DILI, STLTIMORLESTE.com — Governu duni povu, justisa lakon kredibilidade, no konfiansa públika sai ameasadu tanba imposisaun no konflitu iha instituisaun judisiál.
Eis deputadu Parlamentu Nasionál husi bankada Congresso Nacional de Reconstrução de Timor (CNRT) no Prezidente Movimentu Reafirmasaun Reformasaun Nasional (MORRENA), Cesar Valente, hato’o kritika maka’as ba governasaun no sistema justisa Timor-Leste.
Iha nia deklarasaun Valente kritika pratika obrigatoriu ne’ebé, tuir nia, governu uza hasoru povu no problema ne’ebé akontese entre juiz sira iha tribunál.
“Governu duni povu ho obrigatoriu, juízes sira mos duni malu obrigatoriu, sistema ne’e monu hotu,” dehan Valente ho lian maka’as ba STL, iha Dili, Sesta (16/10/2026).
Nia konsidera katak, governu ne’ebé obriga povu sein rona sira-nia hanoin, no konsidera sira-nia kondisaun moris hatudu falta respeitu ba direitu sidadaun.
Valente mós alerta kona-ba situasaun iha instituisaun judisiál, ne’ebé nia haree katak konflitu entre juiz sira bele hamenus independénsia no kredibilidade justisa.
“Se governu obriga povu, no juiz obriga malu, se mak sei defende povu, sistema ne’e sei lakon nia forsa,” nia hatutan.
Nu’udar Prezidente MORRENA, movimentu ne’ebé nia harii hodi reafirma reformasaun nasional, Valente husu governu atu halo avaliasaun ba nia maneira hala’o knaar.
Nia esplika katak, MORRENA la harii atu kontra governu, maibé atu fó hanoin kona-ba nesesidade atu fila fali ba prinsipiu reformasaun, respeita povu, lei no separasaun poder.
Valente mós husu Prezidente Repúblika no Parlamentu Nasionál atu tau matan ba asuntu ne’e, atu pratika obrigatoriu labele sai kultura iha administrasaun públika.
Iha parte ketak Observadór Polítika, Daniel da Silva, hatete katak deklarasaun ne’e reflete preokupasaun kona-ba maneira governu hala’o knaar no implementa reforma iha Timor-Leste.
“Governu presiza rona kritika sira no haree fila fali ba objetivu reformasaun, atu garante respeitu ba povu no prinsipiu demokrátiku,” dehan Daniel.
Daniel husu governu atu simu kritika hanesan kontribuisaun atu hadi’a servisu públiku no reforsa governasaun, la’ós interpreta hanesan atake polítiku.
“Se governu kontinua obriga sein diálogu no poder judisiál la hatudu unidade, konfiansa públika sei tun. Ida ne’e risku boot ba Estadu Direitu Demokratiku,” dehan Daniel.
Nunee mos Akademista Universidade Nasionál Timor Lorosa’e (UNTL), Francisco Soares, konsidera katak imposisaun husi governu no konflitu iha instituisaun judisiál bele hamenus konfiansa públika ba instituisaun estadu.
“Governu tenke hala’o knaar liuhusi diálogu no respeitu ba povu. Iha parte seluk, instituisaun judisiál tenke mantein unidade no independénsia atu garante justisa iha nasaun,” dehan Francisco.
Nia subliña katak governu no instituisaun judisiál presiza loke dalan ba diálogu atu rezolve diferensa, respeita direitu povu no hametin konfiansa públika ba sistema justisa.
Entretantu to’o agora, redasaun seidauk hetan resposta ofisiál husi governu no Konsellu Superior Magistratura Judisiál kona-ba asuntu ne’ebé temi iha notísia ne’e.
(car)
