DILI, STLTIMORLESTE.com — Jurista José Pedro Camoes husu magistradu sira atu rezolve problema internu liuhosi diálogu, respeitu malu no kumprimentu ba ética judisiál, hodi mantein integridade profisionál no hametin konfiansa públiku ba sistema judisiáriu.
José Pedro hato’o pozisaun ne’e nu’udar sidadaun Timor-Oan, hafoin akompaña ekipa júri internasionál hasoru Primeiru-Ministru iha Palásiu Governu, Dili, Kinta (15/10/2026).
Nia subliña katak, magistradu sira iha responsabilidade atu respeita lei, direitu, obrigasaun no dever profisionál, tanba sira sai ezemplu ba sosiedade liuhosi kumprimentu lei no administrasaun justisa.
Tuir José Pedro, públiku observa oinsá magistradu sira hala’o knaar, aplika lei no kumpre prinsípiu ética no deontolojia profisionál, inklui iha relasaun ho kolega sira iha sistema judisiáriu.
Tanba ne’e, nia konsidera katak problema ne’ebé mosu iha prosesu internu tenke rezolve ho diálogu no komprensaun mútua, la’ós liuhosi presaun ka konflitu.
“Magistradu sira rasik mak ema kompetente atu buka dalan di’ak ba solusaun. Tanba ne’e, importante tebes atu sira tuur hamutuk, ko’alia malu, rona malu no buka komprensaun komún,” nia afirma.
Nia mós subliña katak, lideransa iha Tribunal Rekursu presiza kria ambiente servisu ne’ebé nakloke ba diálogu, atu magistradu sira bele hato’o problema ne’ebé afeta sira-nia karreira no servisu, no hamutuk buka solusaun ne’ebé apropriadu.
José Pedro esplika katak, problema sira-ne’e tenke trata tuir mekanizmu legál ne’ebé vigora, inklui prosedimentu iha Konsellu Superior, medida disiplinár, rekursu no reklamasaun, tuir natureza kazu no lei aplikável.
Nia enfatiza katak, integridade, karakter, ética no deontolojia profisionál nu’udar prinsípiu importante ne’ebé magistradu sira tenke aplika iha sira-nia knaar loroloron.
Prinsípiu hirak-ne’e la’ós importante de’it iha relasaun entre magistradu sira, maibé mós iha relasaun ho advogadu, Ministériu Públiku no sosiedade tomak.
Iha parte ikus, José Pedro husu magistradu sira atu trata asuntu hotu ho kalma, diálogu no responsabilidade, hodi evita konflitu sai boot liután no hametin konfiansa públiku ba instituisaun judisiária.
(jos)
