BAUCAU, STLTIMORLESTE.com – Ministériu Juventude Desportu Arte no Kultura (MJDAK) apoiu orsamentu hamutuk rihun US$10,600 ba Kopa PAM 2026 iha Munisípiu Baucau, ne’ebé envolve klubu 30 resin iha modalidade futeból mane no futsal feto.
Serimónia abertura kompetisaun ne’e hala’o iha Estádiu Tadeu Laikana, Vila Nova, Baucau, prezide direita husi Ministru Juventude, Desportu, Arte no Kultura, Nelyo Isaac Sarmento, no Prezidente Autoridade Munisipál Baucau, Veneranda Eurico Lemos Martins, hamutuk ho autoridade sivíl no militár, no adeptu desportu sira.
Kopa PAM 2026 envolve klubu 28 iha modalidade futeból onze ba mane no klubu seluk futsal ba feto. Jogu dahuluk iha abertura kompetisaun ne’e kompete husi Klubu Destinu no Klubu Amadora.
Ministru Nelyo Isaac Sarmento esplika katak apoiu finanseiru ne’e atu dezenvolve desportu hahú husi baze, inklui eskola, postu administrativu no munisípiu, hodi identifika atleta sira ne’ebé bele reprezenta Timor-Leste iha futuru.
“Ida-ne’e tenke hahú husi baze, hanesan iha eskola, postu administrativu no munisípiu, tanba husi ne’ebá mak ita bele dezenvolve atleta sira ne’ebé iha futuru sei sai atleta nasionál,” Ministru Nelyo Isaac hatete iha seremonia abertura jogu kopa PAM iha Baucau, Kinta (15/10/2026).
Governante ne’e promete sei kontinua fó apoiu orsamentál kada tinan ba Autoridade Munisipál Baucau, atu organiza Festival Desportu Munisipál, ne’ebé planeia hala’o iha fulan-Abríl, tuir loron fundasaun Munisípiu Baucau.
Prezidente Autoridade Munisipál Baucau, Veneranda Eurico Lemos Martins, hato’o agradese ba Governu, liuhusi MJDAK, tanba apoiu ne’ebé permite realizasaun kompetisaun ne’e, atu hasa’e talentu joven sira iha área desportu.
“La’ós tanba osan mak halo ita hamutuk, maibé ita-nia hahalok no vontade atu hatudu ita-nia partisipasaun iha dezenvolvimentu desportivu,” Veneranda Lemos hatete.
Eis-deputada ne’e hatutan katak Autoridade Munisipál Baucau hamutuk ho GJDF prepara realizasaun kompetisaun ne’e hafoin simu apoiu finanseiru husi MJDAK.
Nia husu ba klubu partisipante sira atu hatudu espíritu desportivu, respeitu malu no fó oportunidade ba joven feto no mane atu hatudu sira-nia kapasidade durante kompetisaun.
Entertantu kopa PAM 2026 ne’e sai plataforma atu identifika talentu desportivu foun, hametin unidade entre joven sira no promove pás, estabilidade no espíritu desportivu iha Munisípiu Baucau.
(tom)
