DILI,STLTIMORLESTE.com — Primeiru-Ministru (PM), Kay Rala Xanana Gusmão afirma katak, Orsamentu Jerál Estadu (OJE) tenke fó valorizasaun no protesaun ba profesór sira, tanba edukasaun sai baze ba futuru nasaun nian.
Iha diskursu ne’ebé hala’o iha Infordepe, Balide, iha Tersa-feira (27/10), Xanana subliña katak profesór sira iha papél importante iha dezenvolvimentu edukasaun no konstrusaun nasaun.
“Profesór mak hun ba edukasaun, no sira-nia papél tenke hetan valorizasaun no protesaun,” dehan Primeiru-Ministru.
Xanana hatete katak, profesór sira mak ajente transformasaun ba estudante sira, liuhusi prosesu hanorin no aprendizajen iha eskola.
Nia salienta katak, profisaun hanorin kontribui ba formasaun jerasaun foun no konstrusaun nasaun, tanba edukasaun sai prioridade estratéjika iha nasaun barak, inklui Timor-Leste.
Maski nune’e, Xanana rekonhese katak setór edukasaun sei enfrenta dezafiu, liuliu iha área rurál no remota, ne’ebé presiza investimentu kontinua ba infraestrutura eskola, kualidade ensinu no formasaun profesór.
Atu hadi’a kualidade edukasaun, Xanana rekomenda atu hametin formasaun inisiál no kontinua ba profesór sira, hodi asegura katak sira iha koñesimentu no métodu hanorin modernu.
Nia mós subliña, nesesidade atu hadi’a infraestrutura eskola, liuliu iha munisípiu no área rurál, no fó apoiu pedagójiku no kondisaun servisu ne’ebé di’ak ba profesór sira.
Iha parte seluk, reprezentante profesór, Noémio Guterres Soares, hatete katak polítika edukasionál tenke hatán ba nesesidade atuál no prepara eskola sira ba dezafiu sékulu XXI.
Nia esplika katak, transformasaun edukasaun presiza perseveransa, kooperasaun no partisipasaun husi parte hotu, atu kontinua hadi’a prosesu hanorin no aprendizajen.
“Husi ami-nia perspetiva, nu’udar profesór, ami reafirma ami-nia disponibilidade no kompromisu atu kontribui ativamente ba prosesu ida-ne’e, ho profisionalizmu, dedikasaun, sentidu misaun nian, no hakarak konstante atu aprende no hadi’a liután,” dehan Noémio.
Noémio afirma katak, kualidade edukasaun la depende de’it ba polítika iha nivel sentrál, maibé mós ba implementasaun loroloron iha eskola no sala aula.
Nia mós destaka papél diretór no xefe eskola sira iha jestaun, lideransa pedagójika, motivasaun ekipa no kriasaun ambiente seguru, inkluzivu no amigável ba aprendizajen.
(eme)
