DILI, STLTIMORLESTE.com – Komunidade sira neebe uma hetan sobu husi Sekretariu Estadu Asuntu Toponomia no Organizasaun Urbana (SEATOU) ho ekipa, maioria husi povu kbiit laek neebe buka moris iha kapital Dili, tanba nee husu presiza fo kompensasaun hodi tulun netik sira.
Lia hirak nee hatoo husi Feto Potensial, Maria Amaral ba STL iha nia knaar fatin Kaikoli, Dili, Tersa (07/01/2025).
Nia sente tristi haree komunidade neebe hasai sasan ho matan-been, balu faluk, ida nee Governu presiza haree labele hasai deit.
“Sira mai Kapital Dili tanba buka moris iha foho susar hetan osan, tanba nee mak mai Dili, oinsa mak buka osan maibe fatin laiha, balu sosa tutan hodi gasta osan no tenaga halo uma iha tinan barak nia laran maibe tanba kontra lei, maibe husu governu ho fuan boot hasai sira tenke fo netik kompensasaun ruma ba sira nunee sira bele uza tahan netin moris iha fulan balu hodi buka fali osan,” katak nia.
Nunee mos Prezidente Republika, Jose Ramos Horta hatete, Governu presiza fo kompensasaun ba komunidade neebe nia uma hetan sobu husi SEATOU) ho ekipa.
PR Horta kestiona asaun despeju neebe SEATOU hamutuk ho Ministeriu Obras Publika (MOP) no Autoridade Munisípiu Díli halo hasoru komunidade nia uma iha Fumento II nomos fatin seluk tan, tanba sein halo indemnizasaun ba komunidade.
“Tenke halo kompensasaun, hau rona governu fo ona kompensasaun maibe hau mos rona iha fatin balu governu duni sai tiha too agora nein duit metan buatomak nee Sekretariu Estadu nee halo arogansia demais. Hau mos la konkorda membru F-FDTL no PNTL partisipa iha buat sira nee, hau la presiza ema ruma hanorin hau kona-ba planu organizasaun nee ita hotu hatene konhese, laos iha kakutak deit, maibe buat nee tenke halo planu ida atu realokasaun ba ema sira nee iha neebe sira kontribui ba sira nia ekonomia kontribui fo empregu, gasta osan lubuk ida hadia sira nia bisnis,” dehan PR, Horta.
(eme)
