DILI, STLTIMORLESTE.com — Governu Timor-Leste husu Embaixada Xina atu halo koordenasaun ho emprezáriu no komersiánte Xina iha Timor-Leste, liuliu na’in loja sira, atu simu no fa’an produtu lokal Timor-Leste.
Diretór-Jerál Ministériu Komérsiu no Indústria (MCI), Jorge Pereira, hatete pedidu ne’e importante tanba emprezáriu Xina barak hala’o atividade negósiu iha Timor-Leste no iha oportunidade atu ajuda produtu lokal tama ba rede loja sira.
“Ohin loron ita hotu hatene, ita nia maluk Xina sira barak iha Timor halo atividade negósiu. Ami husu ba Embaixada Xina atu halo kombinasaun ho emprezáriu sira, liuliu na’in loja, atu bele simu mos produtu lokal Timor nian,” dehan Jorge iha ambitu asina MoU iha edifísiu Assosiasaun Café Timor (ACT), Fatuhada, Dili, Tersa (08/09/2026).
Nia hatete, MCI durante ne’e fó apoiu ba produtu lokal atu diversifika merkadu, maibé desafio prinsipál mak asesu ba merkadu. Tanba ne’e, Governu hakarak produtu sira ne’ebé hetan apoiu husi Governu, ONG no asosiasaun bele hetan oportunidade atu fa’an iha loja Xina sira iha Dili no munisípiu sira.
Jorge hatete, abertura merkadu ne’e bele ajuda hasa’e atividade ekonomia família sira, aumenta produsaun no fó oportunidade ba prodútór lokal atu hadia sira nia kapasidade atu kompete iha merkadu.
“Liu husi eventu asina MoU ida ne’e, Xina mos nakloke odamatan atu simu produtu lokal husi Timor oan sira hodi fa’an iha loja Xina sira nian,” nia hatete.
Entretantu, Vice-Presidenti ACT, Afonso Oliveira, hatete desafio ne’ebé prodútór kafe sira enfrenta la’ós kualidade de’it, maibé mós kuantidade produsaun ne’ebé seidauk sufisiente atu abastece loja no merkadu.
Nia hatete Governu no asosiasaun sira presiza kontinua apoia to’os-na’in atu hasa’e kuantidade produsaun, nune’e produtu bele disponivel nafatin iha merkadu.
“Buat ne’ebé atu halo mak Governu no asosiasaun sira tenke apoiu agrikultór ka to’os-na’in sira hodi hasa’e sira nia kuantidade, para bele fa’an iha loja no merkadu,” dehan Afonso.
Nia hatutan planu ACT iha futuru mak hadia produsaun no aumenta kuantidade, tanba kualidade di’ak mesak sei la sufisiente se produsaun la to’o ba nesesidade merkadu.
To’os-na’in kafe, Rui da Costa, mós husu Governu atu fó atensaun ba produsaun agríkola, hodi garante katak produtu to’os-na’in bele tama ba loja sira, inklui loja Xina iha Timor-Leste.
Rui konsidera oportunidade ne’e bele fó benefísiu diretu ba to’os-na’in liu husi venda produtu lokal no aumenta rendimentu família.
“Nudar povu agrikultór, hau kontenti tebes se Governu Timor-Leste ho Governu Xina iha akordu atu simu produtu lokal husi Timor oan sira hodi fa’an iha loja Xina sira iha Dili no munisípiu,” dehan Rui.
Nia fiar katak, se Embaixada Xina konkorda ho pedidu Governu no halo koordenasaun ho emprezáriu Xina sira, medida ne’e bele sai pasu importante ida atu hadi’a ekonomia komunidade agríkola.
(dom)
