AMBENO, STLTIMORLESTE.com – Ministru Transporte no Komunikasaun (MTK), Miguel Marques Manetelu dehan, daudaun nee governu instala starlink ba instituisaun publiku sira too sede suku hotu iha nasaun Timor Leste (TL), tanba nee komunidade Oecusse kestiona kona-ba internet ho linha telephone lentu, ida nee responsabilidade husi kompanhia operadore 3 neebe eziste ona iha nasaun ida nee maka Timor Telecom (TT), Telemor no Telkomcel.
Deklarasaun nee Ministru Miguel Marques Manetelo fo sai ba jornalista STL iha ninia prezensa enkontru linha ministerial ba aprovasaun projetu husi Konselhu Administrasaun Fundu Infraestrutura (KAFI) ho Fundu Espesial ba Dezenvolvimentu (FED) neebe halao iha Salaun Konvensoens 1 de Maiu Palaban, Suku Costa, Postu Administrativu Pantemakassar, Rejiaun Administrativa Espesial Oecusse-Ambeno (RAEOA), Segunda (20/04/2026).
“Kona ba telekomunikasioens, ita tenke fahe buat rua, ida ba serbisu publiku, institutu publiku estadu nian ho segundu ba populasaun. Fornesementu Internet ka mobile ba populasaun, nee responsabilidade ka operadores telekomunikasoens ho ISP sira mak TT, Telemor no Telkomcel. Husi MTK, fornese internet ba instituisaun estadu ka publiku ninian, ida nee ba serbisu publiku. Ohin hau mai Oecusse, rona informasaun katak, projetu neebe maka MTK jere, atu instala starlink iha Sede suku hotu, iha teritoriu nasional, iha Oecusse iha suku 18, suku Kutete ho Monemeko, ida nee sedauk intala tanba suku foun neebe estabele iha tinan 2024, entaun la tama iha lista MTK nian,” dehan Ministru Miguel.
Nia haktuir tan katak, nuudar Ministru MTK, koalia ona ho Ministru Interior, Francisco da Costa Guterres, ba postu Unidade Polisia Fronteira (UPF), liu-liu area neebe maka fibra optika la liu husi neeba, sei instala starlink iha neeba.
“Hau koalia ona ho Ministru Interior, Francisco da Costa Guterres, ba postu UPF, liu-liu area neebe maka fibra optika la liu husi neeba, ita sei instala starlink iha neeba. Hau rona katak, sira atu monta CCTV iha fronteira neeba tanba membru UPF mos uitoan, maibe fronteira nee naruk, entaun serbisu nee tenke integradu, tau ona CCTV, tenke tau eletrisidade, tanba nee postu UFP sira neebe izoladu, tenke tau solar sel ou tenaga suria, tanba nee ami sei koordena para buat nee bele lao ho diak,” Ministru.
Iha fatin seluk, Xefe Suku Suniufe, Tomas Tamele informa katak, ninia komunidade sira iha Suniufe, infrenta problema linha internet tinan barak ona, kompanhia TL, Telemor no Telkomcel sedauk iha inisiativa diak hodi harii sira nia tower linha telekomunikasaun iha Suku ida nee.
“Problema linha telekomunikasaun iha Suku Suniufe, sai problema prinsipal boot, laos ba lider komunitariu sira atu update informasaun database ba governu, pior liu tan maka komunidade sira atu halo komunikasaun liu husi telephone mos araska loos, tanba nee husu ba governu autoridade RAEOA, atu toma atensaun ba povu ninia nesesidade baziku ida maka telekomunikasaun nee,” dehan nia.
Antes nee, Prezidente Autoridade RAEOA, Regio da Cruz Salu, iha ambitu inaugurasaun Kapela Suniufe, rona ona preokupasaun povu ba kestaun linha telekomunikasaun iha Suku nee no iha momentu neeba, nia komprometidu ona atu hatoo informasaun nee ba kompanhia operador 3 iha Oecusse, hodi haree kestaun nee.
“Hau sei komunika ho kompanhia operador telekomunikasaun 3 nee iha Oecusse hanesan TT, Telemor no Telkomcel atu haree kestaun nee, hodi instala mos sira nia linha telekomunikasaun iha area izoladu sira iha Oecusse, nunee fasilita povu halo komunikasaun,” dehan nia.
Relasiona ho preokupasaun povu Oecusse kona ba linha internet, konfirma ho parte ajensia kompanhia telekomunikasaun iha Oecusse liu-liu TT, Telemor no Telkomcel katak, sira la iha kompetensia atu responde problema linha telekomunikasaun, ida nee kompetensia Xefe sira maske durante nee povu preokupa ho linha internet.
(jos)
