DILI, STLTIMORLESTE.com – Governu liu husi Konselhu Ministru hasai ona rezolusaun ida hodi kria ekipa ministerial ida akompanha prosesu konstrusaun Sentru Konvensaun Internasional iha Portu Tibar.
Kestaun nee hatoo husi Primeiru Ministru Kay Rala Xanana Gusmão ba Jornalista bainhira remata halo enkontru semanal ho Prezidente Republika Jose Ramos Horta iha palasiu Prezidensial Nicolau Lobato Bairo Pite, Kinta (16/04/2026).
Primeiru Ministru hatete, Governu liu husi Konselhu Ministru aprova ona rezolusaun liu husi reuniaun Konselhu Ministru neebe halao iha loron kuarta nee, tanba nee mak ohin mai relata hela rezultadu nee ba Prezidente Republika Jose Ramos Horta.
“Ohin mai informa ba Prezidente Republika katak, husi reuniaun Konselhu Ministru hasai rezolusaun hodi kria ekipa ministerial ida hodi bele akompanha prosesu kontrusaun sentru Konvensaun iha Portu Dili ba 2029,” dehan Primeiru Ministru.
Primeiru Ministru hatete, kompanha neebe atu halo husi husi Malazia no nain ba kompanhia promete ona sei halo remata no inaugura iha 20 Maiu 2028.
“Haree toik husi kompanhia sira promete katak sira hakarak no sira husu 20 maiu nee atu lansa premeiru pedra iha tinan 2 iha 20 maiu 2028 inagura tanba nee mak komu buat boot lalais, ita aranja mos, ita nia ADN serbisu hela maibe kuandu buat boot hanesan nee ita sei iha mos konsultor ida estranjeiru neebe hatene akompanha buat sira nee hotu neebe ita bele kompre ita nia resposablidade konaba ASEAN atu mai nee,” katak PM Xanana.
Kuandu mai ASEAN 11 pais no 10 pais mak sei mai, depois sei konvida mos husi rai seluk husi Xefe Estadu Xefe Governu no fatin mos laiha ona tanba nee mak iha kuarta nee Governu liu husi Konsellu Ministru hasai rejulusaun ida nunee visi Primeiru Ministru Francisco Kalbuady Lay kontaktu ho pelican paradise atu konkorda malu ho 10 dias sai.
Iha loron kuarta Konsellu Ministrus halao sorumutu iha Palasiu Governu, Dili, no aprova projetu Rezolusaun Governu, neebe aprezenta husi Vise-Primeiru-Ministru, Ministru Koordenador Asuntus Ekonomikus no Ministru Turizmu no Ambiente, Francisco Kalbuadi Lay, kona-ba Kriasaun Komisaun Interministerial ba Akompanamentu Projetu Konstrusaun Sentru Konvensaun Internasional.
Rezolusaun Governu ida nee kria mekanizmu koordenasaun interministerial ida atu garante akompanamentu kontínuu ba projetu konstrusaun Sentru Konvensaun Internasional, neebe rekonese nuudar inisiativa estruturante ba dezenvolvimentu ekonomiku, promosaun turizmu no hasae kualidade sidade Dili nian.
Rezolusaun nee estabelese konstituisaun komisaun ida neebe ho natureza teknika no konsultiva, neebe organiza iha grupu traballu rua. Grupu trabalhu ida asume funsaun sira dezenvolvimentu projetu nian, ho responsabilidade ba akompanamentu tekniku ba obra, kontrolu kualidade, no verifikasaun ba espesifikasaun konstrusaun nian, enkuantu grupu trabalhu ida seluk asegura koordenasaun interministerial iha nivel supervizaun nian, ho partisipasaun husi reprezentantes husi ministeriu oioin no entidade publika relevante sira.
Entre funsaun prinsipal sira neebe atribui ba komisaun ida-nee maka akompanamentu ba faze oioin projetu nian, koordenasaun entre entidade sira neebe envolve, monitorizasaun ba prazu, kustu no risku finanseiru, no mos identifikasaun ba limitasaun ruma no proposta medidas korretivas. Prevee mos elaborasaun relatoriu periodiku no halao sorumutu regular hodi avalia progresu obra nee.
Koordenasaun jeral ba komisaun nee iha responsabilidade husi Vise-Primeiru-Ministru, ho apoiu tekniku, administrativu no lojístiku neebe fornese husi ninia gabinete, atu nunee bele garante efikasia husi akompanamentu no koerensia iha ezekusaun projetu estratejiku ida-nee.
(eme)
