DILI, STLTIMORLESTE.com – Governu liu husi Konselhu Ministru aprova ona rezolusaun ida, la permite atu loke Postu Administrativu, Suku no Aldeia foun.
Lia hirak nee hatoo husi Primeiru Ministru, Kay Rala Xanana Gusmão ba jornalista sira, bainhira remata halo enkontru semanal ho Prezidente Republika Jose Ramos Horta iha Palásiu Prezidensial Nicolau Lobato, Bairo Pite, Kinta nee (09/04/2026).
Primeiru Ministru hatete, Governu liu husi Konselhu Ministru iha loron kuarta aprova rezolusaun ida husi MAE, tanba 2027 iha eleisaun Prezidensial nomos bele iha eleisaun munisipais, tendensia agora iha Timor laos iha fatin hotu-hotu maibe iha fatin barak Postu ida hakarak sai Postu rua, suku ida hakarak suku rua, suku tolu, aldeia ida hakarak sai aldeia lima, tanba nee rezolusaun la permite atu loke Postu administrativu, Suku no Aldeia foun tan.
PM hatete, sei iha problema sira nee hotu, ho ida nee mak tanba husi STAE tenke prepara dadus, buat sira nee halo ho diak, se lae ba prepara hotu tiha sai fali suku rua fali no aldeia rua fali, entaun ulun moras tan ho dadus no susar.
“Nee duni horiseik hasai rezolusaun ida husi Governu atu la permite tan pedidu atu harii postu foun, suku foun no aldeia foun, agora nee tenke prepara aan daudaun ona dadus, buat sira nee hotu imi mos haree kala akompanha balun lae karik ida rua hau haree beibeik nia oin akompanha hau lao ba lao mai lao halimar pasiar iha munisipiu sira,” dehan Primeiru Ministru.
Primeiru Ministru hatete, durante viajen ba munisipiu sira akompanha kada munisipiu la hanesan balun falta buat oin oin, no balun falta fixa familia no laiha kontrola ba populasaun, tanba nee halo preparasaun diak hodi ba iha Governu lokal.
Nunee mos Konselhu Ministrus aprova projetu rezolusaun Governu neebe aprezenta husi Ministru Administrasaun Estatal, Tomas do Rosario Cabral, kona-ba orientasaun polítika jeral Governu nian sobre divizaun administrativa territoriu no rekonesimentu ba suku no aldeia sira.
Rezolusaun Governu ida nee ho objetivu prinsipal atu asegura estabilidade divizaun administrativa territoriu nian, atu nunee bele garante koezaun territorial, kontinuidade prestasaun servisu públiku ba populasaun, no preparasaun adekuada ba prosesu eleisaun prezidensial iha tinan 2027.
Nunee, Governu determina katak sei la kria Postu Administrativu foun no sei la rekonese suku foun, haree ba impaktu neebe bele mosu husi mudansa sira hanesan nee ba organizasaun aktu eleitoral neebe prevee ona ba tinan 2027. Rezolusaun Governu nee estabelese mos prienximentu obrigatoriu Fixa Família nian hosi membru hotu-hotu hosi aldeia ida-idak iha suku neebe pertense ba, atu nunee bele reforsa mekanizmu ba identifikasaun no organizasaun komunidade lokal sira, no mos dever atu kumpre orientasaun sira husi xefe suku idaj-idak.
(eme)
