DILI, STLTIMORLESTE.com — Akademista sira husu ba Governu atu labele foti desizaun gasta orsamentu besik milhaun US$ 300 iha Orsamentu Jeral Estadu (OJE) 2027 ba projetu neebe la fo benefísiu ekonomiku neebe sustentavel ba rai laran.
Kestaun nee foti husi Akademista UNTL, Marcelino da Silva relasiona ho planu konstrusaun Sentru Konvensaun Internasional iha Portu Antigu Dili, neebe tuir nia presiza hetan estudu viabilidade neebe klean no loloos hodi evita risku finansial ba kofre estadu nian.
“Governu tenke foti desizaun ho matenek. Labele gasta osan boot hodi hamosu fali projetu mamuk neebe gasta deit kofre estadu nian maibe la fo retornu ekonomiku neebe klean no sustentavel wainhira eventu boot sira remata,” dehan Marcelino ba STL, liu husi telefone ba STL, Sesta nee (21/08/2026).
Nia sublina katak, maski investimentu ba infraestrutura boot sira ho objetivu hodi simu simeira internasional sira hanesan ASEAN importante, prioritizasaun ba setor baziku sira sei sai urjente liu ba povu nia moris.
“Milhaun US$ 300 nee montante neebe boot tebes. Governu presiza hatudu transparensia no klarezidade konaba tanba sa projetu neebe sai prioridade, iha tempu neebe setor edukasaun, saude, no bee moos iha rai laran sei presiza nafatin atensaun no investimentu neebe boot,” nia kestiona.
Iha parte ketak, Observador Polítika Mariano de Araújo konsidera katak planu alokasaun orsamentu boot nee presiza hetan fiskalizasaun rigoroza husi Parlamentu Nasional, atu nune’e labele hamosu fali gasta neebe leet iha OJE 2027.
“Hau haree katak estadu tenke foti desizaun ho kuidadu boot, no prioritiza interese primariu povu nian antes foti desizaun ba projetu foun nee,” dehan Mariano.
Nia hatutan, Parlamentu Nasional labele pasiva fali hodi aprova deit proposta orsamentu sira neebe foti osan boot, maibe tenke ejize estudu trkniku neebe klean husi Governu hodi hamutuk kria estabilidade ekonomika iha futuru.
Entretantu Komisaun Revizaun Politika (KRP), deside aprova orsamentu hamutuk milhaun US$ 300 ba kontrusaun projetu Sentru Konvensaun Internasional (ICC) iha Portu Antigu Dili.
Tanba tuir planu, Governu sei transforma area Portu Antigu Dili nee, sai sentru konvensaun modernu neebe kompletu ho sala konferensia no fasilidade komersial sira.
(car)
