BAUKAU, STLTIMORLESTE.com – Governu liu husi Ministeriu Planeamentu no Investimentu Estratejiku (MPIE) lansa ona fatuk dahuluk ba reabilitasaun estrada rural diresaun Suku Loilubu, Postu Administrativu Vemasi too area Fatumaka, Postu Baukau Vila, Munisipiu Baukau.
Estrada refere ho distansia liu kilometru (km) 18 no responsabiliza husi kompanhia lokal 3 mak hanesan, kompanhia Golden Way ezekuta pakote dahuluk distansia km 6.040 ho valor orsamentu US$ 4.050.246.70, pakote daruak km 6.025 ezekuta husi kompanhia Glory Enterprise ho valor US$ 4.131.791.10 no pakote datoluk km 6.025 ezekuta husi kompanhia Jolitoni Unipessoal Lda US$ 3.850.083.25 neebe tuir kontratu kompanhia 3 refere durasaun servisu fulan 12.
Liu husi diskursu, Ministru Planeamentu no Investimentu Estratejiku, Gastão de Sousa argumenta, Governu iha obrigasaun atu haree kondisaun infraestrutura sira liu-liu estrada, tanba komunidade iha baze maioria moris agrikultura neebe presiza atu transporta produtu lokal asesu merkadu, hodi selu oan sira nia eskola inklui fasilita asesu saude.
“Hau hakarak husu ba kompanhia 3 nee nia responsabilidade ba reabilitasaun estrada ida nee, tanba ita boot sira iha tinan 1 deit atu hadia estrada ida nee, sei laiha estensaun ba kontratu, tanba povu prezisa dezenvolvimentu atu hadia moris,” hatete Ministru nee iha Loilubu, hafoin remata serimonia lansamentu fatuk dahuluk, Sesta (17/01/2025)
Governante nee dehan, durasaun servisu ba kompanhia 3 refere tinan 1, neebe tuir planu remata inisiu tinan 2026, nunee husu atu servisu ho responsabilidade, tanba bainhira data kontratu remata Governu sei la halo estensaun ba data kontratu.
Aleinde mos husu ba Autoridade sira iha Munisipiu Baukau nomos komunidade sira hela iha Loilubu no Fatumaka atu tau matan ba projetu refere no fo ajuda mos ba parte kompanhia sira bainhira iha nesesidade presiza, nunee bele finaliza servisu tuir data kontratu neebe iha.
Iha fatin hanesan, reprezentante kompanhia 3, Diretor Kompanhia Jolitoni Unipessoal Lda, Julito garante sei finaliza obra reabilitasaun estrada refere ho responsabilidade tuir kontratu neebe determina ona iha kalendariu kontratu, tanba progresu hatudu ona ba implementasaun servisu neebe termina uluk ona ba reabilitasaun estrada husi Suku Triloka too Ostiku.
Enkuantu Prezidente Autoridade Munisipiu Baukau, Veneranda Lemos konsidera, reabilitasaun estrada refere importante, tanba bele fasilita komunidade agrikultor sira husi Suku Loilubu too area Fatumaka no Suku Vizinhu seluk sira bele asesu hodi lori produtu lokal ba merkadu.
Autoridade Administrasaun Munisipiu Baukau nee husu ba kompanhia implementador sira, bainhira hasoru problema ruma iha terenu informa ba Autoridade Suku no kontinua ba Autoridade Munisipal hodi fo solusaun, tanba projetu refere husi nasional, neebe finaliza sei fo benefisiu ba komunidade Baukau, liu-liu Suku Loilubu no Suku vizinhu sira.
Entretantu Xefe Suku Loilubu, Joanico da Costa Freitas promete sei koopera ho kompanhia implementador sira, nunee projetu refere bele finaliza tuir data kontratu neebe determina ona, tanba durante nee komunidade sira enfrenta problema infraestrutura bazika hanesan estrada.
(EST 2)