Governu Presiza Kontrola Peska Ilegal

Polisia Maritima halao hela servisu kontrola peska ilegas iha tasi (Foto: Espesial)

DILI, STLTIMORLESTE.com – Governu presiza iha hanoin atu aumenta fasilidade, hodi halo kontrolu ba peska ilegal iha tasi laran.

Kestaun nee hatoo husi Visi Diretor HAK, Antonino de Limas ba jornalista sira iha nia knaar fatin Farol, Dili, Kuarta (15/01/2025).

“Ita nia rekomendasaun, ita koalia dala barak problema nee governante sira hatene, tanba ita nia rikusoin iha tasi laran peskador husi nasaun seluk naok tanba ita mos la kontrola, la kontrola tanba menus fasilidade, no uluk iha roo Naval ida maibe agora aat para hela Naval neeba, la hatene agora simu tan roo foun hira no fasilidade nee kompletu ona halo kontrolu ka lae,” katak nia.

Nia hatutan, fasilidade menus susar atu bele halo kontrola ba iha tasi, liu-liu kontrola ba iha peska ilegal sira neebe mak mai naok beibeik riku soin Timor nian.

“Tanba importante, nee mak Governu iha planu ka lae, ho hanoin atu rezolve, presiza roo ba patrulhamentu ka lae, se presiza kada tinan sosa uluk roo ida, depois tinan oin tau tan osan sosa ekipamentu oituan oituan, labele koalia deit maibe laiha asaun ruma,” katak nia.

Iha sorin seluk, Diretor AJAR, José Luis de Oliveira kestiona tanba saida mak Primeiru Ministru, Kay Rala Xanana Gusmão kansela roo sira neebe apoiu husi Australia mai Timor Leste, hodi halo kontrola ba peska ilegal sira nee.

Kondisaun ida mak presiza iha roo, no Australia mos oferese roo no fo mos treinamentu ba FDTL no PNTL sira, oinsa opera roo sira nee atu kontrola tasi ibun, maibe Primeiru Ministru mak kansela fali ema nia ajudu nee oinsa.

“Husu ba PM tanba sa kansela konsiderasaun nee saida, nee lahan ho liafuan ida agora katak fasilidade laiha, agora ema fo fasilidade ba kansela fali, klaru ita presiza duni fasilidade hodi kontrolu, Polisia Marina, F-FDTL presiza duni halo kontrola ba tasi, tanba nee ita nia soberania no ita nia riku soin barak mak lakon, ikan sira neebe mai husi Atauro nee dala barak sosa husi Wetar, ita laiha kbiit atu halo kontrolu,” katak nia.

(eme)

Share it :

Leave a Reply

Your email address will not be published. Required fields are marked *