DILI, STLTIMORLESTE.com – Oekusi iha material prima barak neebe atu halo fabrika hodi esporta ba rai liur hanesan Bambu (au), tanba nee Governu sei harii sentru Bambu, nunee mos nehek metan knuuk neebe kada tinan esporta ba Indonezia Nusa Tenggara Timur (NTT) tonelada rihun 60.
Koordenador Komisaun Ezekutiva Zona Ekonomika Espesial Dezenvlvimentu Oekusi-Ambeno (KE-ZEEDOA), João Mendes Gonsalves hatete, iha Oekusi sira defini tiha ona buat balun, neebe bele aumenta valor ba material prima sira, halo fabrika bele haruka ba rai liur.
“Ita iha neeba mos pontensial atu harii Sentru Bambu, hanesan ida iha Tibar, hau rasik kria uluk nuudar Ministru Dezenvolvimentu Ekonomia mak hau funda, no ohin loron fo servisu ba ema 80 resin, fabrika mobiliariu oin-oin deit. Ema barak mak ba sosa, Oekusi potensial mos atu bele halo mos Sentru Bambu”, dehan João Mendes ba jornalista sira iha Palasiu Governu, Dili, Tersa (10/12/2024.
Nia hatutan, sira iha ona akordu kooperasaun ho Institutu Bambu Tibar atu sira apoia bibeirus no seluk tan, neebe sira prepara ona, sei fahe ba populasaun, tanba ai bambu nee iha nia efeitus ekonomiku lubuk ida.
Bambu nee diak ba meiu ambiente, bainhira kuda bambu barak iha fatin rai halai, nia abut sei metin, benefsiu seluk mak ba industria ba bambu. Nunee mos populasaun neebe kuda bambu bele fahe makina ba sira fera lori ba fabrika, tanba nee populasaun sira hakiak bambu nee sira bele faan no hetan rendimentu, bele aumenta tan sira nia atividade, aleinde halo toos ho natar.
“Oekusi iha mos material prima barak hanesan nehek metan nia knuuk, husi Oekusi esporta ba Nusa Tenggara Timur kada tinan tonelada rihun 60, nebee ita iha posibilidade boot atu halo produtu ba hahan, aimoruk, tinta no sleuk tan”, tenik João.
Nia hatete, sira halo ona komunikasaun ho ema nebe esportasaun ba nehek metan knuuk nee, karik bele loke deit fabrika ida iha Oekusi, atu halo fabrika bele iha vantazen boot ida, tanba Indonezia no Australia laiha, ida nee vantajen boot ba Timor.
(gui)
