DILI, STLTIMORLESTE.com – IX Governu Konstitusional sei haruka lei rejime divida publika neebe Konselhu Ministru aprova ona ba Parlamentu Nasional (PN).
Lia hirak nee Primeiru Ministru (PM), Kay Rala Xanana Gusmão ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial, Kinta (23/04/2026) hattete, tempu badak Governu sei haruka lei rejime divida publika neebe konsellu Ministru aprova ba Parlamentu Nasional.
Primeiru Ministru hatete, ohin mai relata saida mak Governu liu husi Konsellu Ministru aprova ona ba Prezidente Republika Jose Ramos Horta.
Primeiru Ministru hatete, mai hasoru Prezidente Republika nee enkontru semanal hatoo ba Prezidente saida mak Governu liu husi konsellu Ministru aprova.
“Konaba alterasau lei konaba divida publika sei haruka ba parlamentu iha neeba mak ita boot sira mos sei akompanha haree didiak oinsa,” dehan Primeiru Ministru.
Primeiru Ministru hatutan tan katak, konaba taxa ba kareta no motor haruka ona mai Prezidente Republika maibe kestiona buat balun, haruka fila fali no iha koresaun uitoan.
“Taxa anual kada kareta ida selu hira, oin nusa, problema boot nee mak ita halo estrada. Maibe iha fatin barak estraga estrada sira laos deit udan, maibe kareta ida bobot tebes, todan tebe-tebes mak estraga estrada. Maibe Prezidente Republika dehan, nia sei haree tanba sei haruka mai Prezidente Republika atu promulga tama iha dekretu lei ida,” katak PM Xanana.
Nunee mos Konsellu Ministrus halao sorumutu iha Palasiu Governu, Dili, no aprova projetu Proposta Lei, neebe aprezenta hosi Ministra Finansas, Santina Jose Rodrigues F. Viegas Cardoso, alterasaun dahuluk ba Lei n. 13/2011, loron 28 fulan-setembru, kona-ba Rejime Divida Publika.
Proposta nee permite habelar tan ambitu emisaun divida publika nian, hodi la limita deit ba finansiamentu infraestruturas estratejikas, atu nunee bele permite uza instrumentu hanesan titulu Tezouru hodi finansia despeza jeral Estadu nian.
Alterasaun ida nee ho objetivu atu alina rejime divida publika nasional ho pratika sira neebe adota ona iha maioria nasaun sira no kria kondisaun ba jestaun finansas publikas ida neebe sustentavel liu iha mediu no longu prazu.
Ho inisiativa ida nee, Governu hanoin atu hametin sustentabilidade orsamental, prepara nasaun ba diminuisaun progresiva reseita husi Fundu Mina-rai, no mos garante estabilidade boot-liu iha finansiamentu politika publika neebe esensial.
Projetu Proposta Lei ida-nee hetan ona deliberasaun iha sorumutu Konsellu Ministrus loron 27 fulan-janeiru tinan 2026. Maibe, tuir ajustamentus neebe introdus iha faze redasaun final, liuliu atu klarifika regras neebe relasiona ho emisaun no jestaun Titulus no Letras Tezouru, presiza reavaliasaun no deliberasaun foun ba Projetu Proposta Lei ida-nee.
(eme)
