DILI, STLTIMORLESTE.com – Governu komesa alargamentu estrada 400 resin iha Dili no promete fo kompensasaun ba uma afetadu hafoin kompleta dadus sira neneik.
Tuir Xefe Suku Comoro, Elijio Jose Marçal katak, Governu liu husi diresaun relevante komesa ona prosesu alargamentu estrada kuaze 400 resin. Sosializasaun ba komunidade, xefe suku no autoridade lokál konklui ona.
Nia dehan, ekipa Obras halo ona levantamentu dadus ba uma sira neebe kona projetu.
“Uma neebe kona sei hetan kompensasaun. Rai nee rai estadu maibe uma propriedade sidadaun. Estadu tenke selu fali gastu konstrusaun, osan ateru, no karik sosa rai karada ida ka rua, tenke fo fali atu sira bele halo uma iha fatin seluk,” hatete Xefe Suku Comoro, Elijio Jose Marçal ba STL, Tersa (25/08/2026).
Tuir nia, komunidade afetadu sira seidauk simu indemnizasaun. Pagamentu sei hahu hafoin dadus kompletu no benefisiáriu sira loke ona konta bankária.
Nia esplika, iha Kampo, planu halo tan sosializasaun iha loron 2 Setembru. Maibe autoridade suku seidauk fo konfirmasaun final tanba iha loron hanesan mos ajenda prezensa urna Bispu sira iha Dili.
Autoridade relevante sei hasoru uluk ho komunidade iha suku hodi fo klarifikasaun ikus konaba kalendariu sosializasaun.
Iha fatin ketak, Jose Ximenes nuudar Komunidade Suku Comoro informa, Governu komesa alargamentu estrada 400 resin iha Dili no promete fo kompensasaun ba uma afetadu.
“Ita nia Governu komesa alargamentu estrada 400 resin iha Suku Comoro, no sira promete fo kompensasaun ba uma afetadu, too agora ami hein rezultadu, maibe seidauk iha,” nia koalia.
Nia afirma, nuudar sidadaun Timor oan tenke kordenasaun diak, no tenke kontribui ba dezenvolvimentu iha nasaun ida nee.
Entretantu dadus neebe STL asesu iha online katak, seidauk iha relatoriu espesífiku ba Suku Comoro 2026. Projetu alargamentu nee sei tama iha kategoria “Involuntary Resettlement” no dadus finál normalmente sai husi Ministériu Obras Públikas ka Diresaun Relevente hafoin sira valida hotu.
(jen)
