DILI, STLTIMORLESTE.com – Governu liu husi Sekretariu Estadu Komunikasaun Sosial (SEKOMS) planu sei loke oportunidade fo formasaun ba jornalista nasionais tomak, oinsa bele kualifika kapasidade profisional iha Timor Leste (TL).
“Ita iha planu atu loke oportunidade ba jornalista sira hotu, liu-liu loke formasaun ba sira, oinsa bele orienta dalan hakerek emprime neebe kualidade diak, tanba nee karik politika SEKOMS dehan loke, entaun planu ba oin kontinua fo oportunidade ba jornalista sira,” dehan Diretor Jeral SEKOMS, Florindo da Costa ba jornalista sira iha Pantai Kelapa, Dili, Kinta (05/12/2024).
Tanba tuir nia, oportunidade neebe atu loke ba ema jornalista sira iha TL nee planu efetivu husi Governu liu husi SEKOMS, oinsa bele eduka jornalista sira atu halao nia knaar nuudar independente, no halao nia produtividade emprime sira ho diak, atu bele sosializa informasaun nee los no faktus ba publiku.
No tuir planu SEKOMS kontinua loke formasaun ba jornalista sira oinsa bele hasae sira nia kualidade no kapasidade, oinsa hakerek emprime, hasai foto, nee hatudu katak aprende buat sira neebe tuir dalan ka etika mata dalan jornalizmu nian.
Nunee mos Akademika husi Area Komunikasaun Sosial, Jorge Savio Fernandes dehan, jornalista tenke foti informasaun neebe faktus no los, presiza rekolha informasaun iha sosiedade tuir kondisaun sosial neebe iha, maibe tenke tuir kodigu jornalizmu nian, atu haree ba background notisia nee bele hatudu produtu neebe iha kualifikadu.
Nia dehan, ornalista nia funsaun mak oinsa bele rekolha informasaun sosial sira neebe sosiedade enfrenta liga ba ekonomia, politika, kultura, no setor importante sira iha nasional no internasional sira, ho objetivu oinsa bele hafanu publiku atu hatene kondisaun no situasaun sira iha rai laran.
Tanba nee husi misaun jornalista nian mak atu buka hatene informasaun neebe los no faktus iha sosiedade, atu lori preokupasaun publiku nian ba orgaun estadu neebe sai servidor ka responsabilizador sira iha rai laran, atu hadia no dezenvolve ho diak.
Antes nee, Sekretaria Estadu ba Igualdade (SEI), Elvia Sousa de Carvalho, hamutuk SEKOMS, KI, Programa Nabilan no JSMP, realiza formasaun kona-ba reportajen no kobertura sensivel jeneru no inkluzaun ba jornalista no Xefe Redasaun sira.
Tanba objetivu realiza formasaun nee hodi hasae konhesimentu jornalista no Jestor Radiu komunidade ba area igualdade jeneru no prevensaun violensia hasoru feto no enkuadramentu legal sira, hodi bele halo kobertura ho sensivel ba jeneru.
“Husi meiu komunikasaun sosial mak iha forsa, kbiit no papel importante atu halo mudansa ba mentalidade, tanba nee nia husu jornalista sira atu halo kobertura ho kredivel, faktus los, hodi hafanu publiku ho hatene kondisaun sira iha rai laran,” nia hakotu.
(EST 1)
