DILI, STLTIMORLESTE.com – IX Governu Konstitusional sei taka hotu lei kriasaun Institutu Publiku (IP) no Empreza Publiku (EP), tanba funsionariu simu osan boot maibe servisu la lao.
Primeiru Ministru, Kay Rala Xanana Gusmão hatoo kestaun nee ba jornalista sira, bainhira remata halo enkontru semanal ho Prezidente Republika, Jose Ramos Horta iha palasiu Prezidensial, Nicolau Lobato, Bairo Pite, Kinta (06/03/2025).
Primeiru Ministru dehan, durante nee funsionariu husi Institutu Publiku no Empreza Publiku, simu osan ho montante boot maibe servisu la lao, tanba nee IX Governu Konstitusional sei taka Institutu Publiku no Empreza Publiku.
“Tanba iha funsionariu publiku nee iha nia aat mak ida nee, ema nia aman neeba diretor iha Ministeriu ida karik servisu la diak halo arbiru hasai nia husi neeba, iha neeba mos servisu la diak nafatin halo oin-oin, lae nia iha neeba diretor maibe simu osan oituan, Empreza Publiku ida mosu bolu nia servisu neeba manan osan barak maibe la halo buat ida tanba nia la komprende nee mak IP-EP sira nee ami sei taka hotu,” dehan PM Xanana.
Primeiru Ministru afirma, sei kurizi hotu, lae simu osan barak mos la halo buat ida, nee duni mak prosesu nafatin atu muda tiha mentalidade Estadu nia, funsionariu publiku sira nee hotu ho mos empreza.
“Nee duni servisu ema ruma husu osan sira bolu nunee Broker berdasi, broker sira nee, iha delta nova haruka sira koalia mak sira dehan lae iha duni broker berdasi, tanba saida mak brorker berdasi, tanba nee ita temi karik Ministru, Visi Ministru, Sekretariu Estadu, ho diretor sira berdasi nee mak broker hodi simu osan, nee mak hau dehan kuandu iha fo hatene hau hasai kedas, neebe ita tenke kurizi nafatin tanba osan povu nia jere ho diak, osan mos besik hotu ona, greater sunrise bainhira mak mai, seidauk mai bainhira mak mai ita la.hatene mos,” katak PM Xanana.
Oinsa Primeiru Ministru nia haree kona-ba ahi mate lakan iha Hospital Nasional Guido Valadares, hatan ba kestaun nee PM hatete, ho problema sira nee hotu mak Primeiru Ministru hatete ona sei hasai hotu EP-IP.
“Ida nee hotu mak hau ohin temi ona ka lae? EP-IP sira nee hau sei hamoos hotu,” “dehan Primeiru Ministru.
Prezidente Republika, Jose Ramos Horta mos preokupa ho servisu EP-IP tanba salariu boot liu Prezidente Republika Tribunal Rekursu nian, maibe servisu la lao ahi kontinua mate lakan, komunidade sira kontinua hakilar ba bee moos, tanba nee Prezidente sei koalia ho Primeiru Ministru atu bele koa salariu Funsionariu EP-IP sira nia.
(eme)
