DILI, STLTIMORLESTE.com – Vise Ministru Asuntu Parlamentares, Aderito Hugo da Costa hateten, Primeiru Ministru (PM), Kay Rala Xanana Gusmão ho Ministru Administrasaun Estatal (MAE), Tomas Cabral suspende ona Prezidente Autoridade Munisipiu Aileu, hodi submete ba prosesu investigasaun, ligadu ho aktu neebe nia komete.
Aderito hatete, Governu foti ona desizaun hodi suspende Eis PAM Aileu ho razaun katak, aktu neebe ofisiais estadu nee halo perante publiku lo-loos labele akontese.
Tuir nia, governu laos suspende deit nia, maibe sei loke prosesu investigasaun ba eis Prezidente Autoridade Munisipiu Aileu, ligadu ho akuzasaun sira neebe aprezenta husi vitima.
“Tanba nee kargu publiku tenke suspende para depois submete nia ba prosesu sira iha justisa nian, se kazu nee ema ruma sente violadu para atu prosesu,“ hatete nia ba jornalista sira iha Parlamentu nasional, Tersa (21/07/2026).
Nia hatutan, desizaun neebe Governu foti nee atu fanu ofisial estadu nian atu uza kargu ho didiak hodi fo atendimentu neebe diak ba populasaun sira, laos uza hodi komete aktus sira neebe la merese atu akontese.
“Ho prosesu ida nee fo lisaun ba ema hotu-hotu, liu-liu ofisial estadu nian iha nasional too baze atu haree konfiansa kargu estadu nian iha kraik nee hodi servi povu ho lo-loos, laos uza atu loko aan ou komete tan aktu sira neebe la podia akontese,” tenik nia.
(alb)
