DILI, STLTIMORLESTE.com – Governu Tailándia apoiu Orsamentu US$ 3,100 ba Fundasaun Alola atu apoia programa kapasitasaun no empoderamentu ekonómiku ba feto Timor oan sira.
Tuir Embaixador Tailándia iha Timor Leste, Atipat Rojanapaibulya entrega kontribuisaun finanseira ho montante US$ 3,100 husi Governu Tailándia ba Fundasaun Alola atu apoia programa kapasitasaun no empoderamentu ekonomiku ba feto Timor oan sira.
Nia kompromisu Tailándia atu hametin seguransa umanas no promove empoderamentu feto no labarik sira nian iha Timor Leste liu husi kooperasaun iha area saude publika, edukasaun no meiu ambiente ekonomiku. Husi tinan 2012, Governu Tailándia liu husi Embaixada Real Tailándia nian iha Dili, fo apoiu finanseiru no sasan sira ho kontínua ba Fundasaun Alola.
Iha fatin hanesan, Diretora Ezekutiva Fundasaun Alola, Maria Imaculada Guterres esplika, espresa nia agradesimentu ba apoiu kontínua husi Embaixada Reál Tailándia nian.
Nia afirma katak, kontribuisaun nee sei uza atu harii kapasitasaun ba grupu artezaun sira liu husi meius hadia kualidade produtu no diversifikasaun produtu sira, hanesan mos ho aumenta sira nia meius asesu ba merkadu liu husi partisipasaun iha Fundasaun nia feira tinan klaran no feira Natal nian. Esforsu sira nee ho objetivu atu aumenta oportunidade rendimentu ba artezaun sira no sira nia família.
Fundasaun Alola mak organizasaun non lukrativa neebe harii iha tinan 2001 husi Kirsty Sword Gusmão. Fundasaun nee foka liu ba programa edukasaun, saude no dezenvolvimentu ekonomiku atu hadia kualidade moris feto no labarik sira nian iha Timor Leste.
Entretantu entrega apoiu nee mos marka selebrasaun ba Aniversáriu Ksolok husi Sua Majestade Liurai Inan Sirikit no loron Inan Nasionál iha loron 12 Agostu 2026, neebe foka ba Sua Majestade nia kompromisu naruk no dedikasaun metin ba empoderamentu feto sira nian no meius hadia kualidade moris ba feto no labarik sira.
(jen)
