DILI, STLTIMORLESTE.com – Governu Xina liu husi United Nations Children’s Fund (UNICEF) entrega tanki bee hamutuk 25 ba Bee Timor Leste, Empreza Publika (BTL.EP), hodi responde ba area inundasaun no rai monu.
“Ha’u haksolok tebes bele partisipa iha serimonia entrega ba loron ohin nian, hodi fornese tanki fornesimentu bee ba BTL, hau lori Governu Xina nia naran hatoo hau nia agradesimentu ba BTL neebe fo ona apoiu ba projetu nee, no mos agradese ba Gabinete Reprezentativu UNICEF nian iha Timor Leste ba nia profisionalizmu no organizasaun neebe efisiente durante implementasaun projetu nee,” hatete Embaixadora Xina ina iha TL, Wang Wenly ba jornalista sira iha Kolmera, Segunda (9/06/2025).
Nia dehan, bee mak fonte moris nian ba labarik sira, ba inan feto sira no komunidade tomak, asesu ba bee neebe seguru no moos laos de’it kestaun saude nian maibe mos kestaun ida kona-ba dignidade, oportunidade no ba futuru.
“Menus bee no infraestrutura neebe fraku bele fo impaktu makaas ba dezenvolvimentu sosial no aumenta vulnerabilidade grupu desfavoresidu sira hanesan labarik sira, ba ekipamentu ida nee no garante katak ema barak asesu ba bee neebe moos no seguru,” tenik nian.
Iha fatin hanesan, Reprezentante UNICEF iha TL, Pratizia di Giovanni fundamenta, entrega tanki bee hamutuk 25, idak-idak ho nia kapasidade 5,200 litrus atu apoiu ba komunidade sira neebe mak afetadu husi inundandasaun no rai monu neebe akontese iha 2021.
“Iha tinan hirak ikus nee ita haree ona inundasaun neebe akontese beibeik sai dezafius boot ba ita nia komunidade sira iha Timor laran tomak, halo populasaun barak mak evakua ba fatin refuziadu sira no kauza infraestrutura barak mak aat halakon sistema bee nia, liu-liu iha Dili, Baukau, Ainaro no Ermera,” nia afirma.
Aleinde nee mos Prezidente BTL.EP, Gustavo da Cruz hatutan, serimonia entrega tanki unidade 25 mai iha BTL, apoiu nee hetan kooperasaun entre Governu Xina ho UNICEF, tuir lo-loos apoiu nee mai iha tinan 2021 wainhira iha kalamidade nee akontese, maibe liu husi prosesu sira hotu ohin mak entrega.
“Destinadu ba munisipiu haat mak hanesan Dili Baukau, Ainaro no Ermera, nee laos tamba inundasaun deit mak entrega maibe ba mos eventu sira neebe estrimi oituan ho ita nia mudansa klimatika ami fo ba munisipiu ida hetan lima, restante iha Dili para ami bele atende ba situasaun emergensia sira,” katak nia.
Nia dehan, husi apoiu ida nee seidauk sifusiente maibe ida nee bele haree deit ba fatin neebe mak mais importante, mais prioridade para ami bele haree hodi tau para komunidade sira hodi asesu ba bee.
Entretantu Ministru Obras Publika (MOP), Samuel Marçal lori Governu Timor Leste nia naran hatoo agradese ba Governu Xina liu husi UNICEF, tanba tinan barak nia laran sempre apoiu Governu Timor Leste, liu-liu ba komunidade sira iha area rural.
(EST 1)
